69,000 രൂപയ്ക്ക് ഒരു സേഫ്റ്റി പിന്ന്. ഇറ്റാലിയൻ ലക്ഷ്വറി ബ്രാൻഡായ പ്രാഡയാണ് ഈ പൊന്നുവിലയുള്ള സേഫ്റ്റി പിന്ന് പുറത്തിറക്കിയിരിക്കുന്നത്. ക്രോഷേ സേഫ്റ്റ് പിൻ ബ്രൂച്ച് എന്നാണ് ഇതിന്റെ പേര്.
ഓവർസൈസ് മെറ്റൽ സേഫ്റ്റി പിന്നാണിത്. കളർഫുളിലുള്ള പല മോഡലിൽ പല രൂപത്തിലുള്ള അതിമനോഹരമായ പിന്ന്. ഡ്രെസ്സിൽ കുത്താൻ എന്തിന് ഇത്രയും വിലപിടിപ്പുള്ള പിന്നെന്നാകും എല്ലാവരുടെയും ചിന്ത. എന്നാൽ ഇതിന് രണ്ടുണ്ട് ഉപയോഗം. ഒരു പതക്കം പോലെ ബാഗിലും ഭംഗി കൂട്ടുന്നതിനായി ഡ്രസിലും കുത്തിവയ്ക്കാം.
ക്രോഷെ ത്രെഡുകൾ കൊണ്ടാണ് ഇവ പൊതിഞ്ഞിരിക്കുന്നത്. പ്രാഡയുടെ ഒരു ലോഗോ ടാഗും പിന്നിൽ തൂക്കിയിട്ടുണ്ട്. നല്ല തിളക്കമുള്ള മെറ്റൽ ബോഡിയാണ് ഇതിന് ഉപയോഗിക്കുന്നത്. കൈ കൊണ്ട് നെയ്തെടുത്തതാണ് ഇതെന്നാണ് പ്രാണ അവകാശപ്പെടുന്നത്. നിത്യോപയോഗ സാധനങ്ങൾ പുതിയ രീതിയിൽ പുനർ നിർമിക്കുന്നതിന് പേരുകേട്ട കമ്പനിയാണ് പ്രാഡ. ഇത്തരത്തിൽ പേപ്പർ ബാഗുകൾ, ചെരിപ്പുകൾ, ലഞ്ച് ബോക്സുകൾ എന്നിവയ്ക്കും പ്രാഡ പുതിയമുഖം നൽകിയിരുന്നു.
നേരത്തെ, 1.2 ലക്ഷ രൂപ വിലയുള്ള കോലാപുരി മോഡലിലുള്ള ചെരുപ്പുകൾ പുറത്തിറക്കിയതിലൂടെയാണ് പ്രാഡ വാർത്തകളിൽ ഇടംനേടിയത്. കരകൗശല വിദഗ്ധരുടെ ഡിസൈനുകൾ മോഷ്ടിച്ചതിനും അമിതവില ഈടാക്കിയതിനും പ്രാഡക്കെതിരെ വലിയ വിമർശനങ്ങൾ ഉയർന്നിരുന്നു.
ക്രോഷേ സേഫ്റ്റി പിൻ ബ്രൂച്ച് എന്ന ലക്ഷ്വറി പിന്നും അതിന്റെ വിലയും സോഷ്യൽമീഡിയയിൽ പ്രത്യേക്ഷപ്പെട്ടതോടെ രസകരമായ കമന്റുകളുമായി നമ്മുടെ ഇന്ത്യക്കാരും രംഗത്തെത്തി. നമുക്ക് 10 രൂപയ്ക്ക് വലിയൊരു പാക്കറ്റ് പിന്ന് തന്നെ ഇവിടെ കിട്ടുമെന്നും 69,000 രൂപയ്ക്ക് സ്വർണത്തിലും വെള്ളിയിലും പിന്ന് ഉണ്ടാക്കി തരാമെന്നുമൊക്കെയാണ് കമന്റുകൾ.
