തൃശൂർ: തിയേറ്റർ നടത്തിപ്പുകാരനും ഡ്രൈവർക്കും വെട്ടേറ്റു. തൃശൂർ രാഗം തിയേറ്ററിലെ നടത്തിപ്പുകാരൻ സുനിൽ, ഡ്രൈവർ അജീഷ് എന്നിവർക്കാണ് വെട്ടേറ്റത്. കഴിഞ്ഞ ദിവസം രാത്രി പത്ത് മണിയോടെയായിരുന്നു സംഭവം. ആക്രമണത്തിന്റെ സിസിടിവി ദൃശ്യങ്ങൾ പുറത്തുവന്നു.
ആക്രമണത്തിന് പിന്നിൽ ക്വട്ടേഷൻ സംഘമാണെന്നാണ് വിവരം. സുനിലിന്റെ വീടിന് മുന്നിൽ വച്ചാണ് ആക്രമണമുണ്ടായത്. വീട്ടിലെത്തി ഡ്രൈവർ ഗേറ്റ് തുറക്കുന്ന സമയത്തായിരുന്നു ആക്രമണം. മറഞ്ഞിരുന്ന സംഘം സുനിലിനും അജീഷിനും നേരെ ചാടിവിഴുകയായിരുന്നു.
അജീഷിനാണ് ആദ്യം വെട്ടേറ്റത്. പിന്നീട് സുനിലിനെയും വെട്ടുകയായിരുന്നു. ഇവരെ ആശുപത്രിയിൽ പ്രവേശിപ്പിച്ചിട്ടുണ്ട്. മൂന്ന് പേരാണ് സംഘത്തിൽ ഉണ്ടായിരുന്നതെന്നാണ് സിസിടിവി ദൃശ്യത്തിൽ നിന്ന് വ്യക്തമാകുന്നത്. പൊലീസ് കേസെടുത്ത് അന്വേഷണം ആരംഭിച്ചു.
