എറണാകുളം: നടി ആക്രമിക്കപ്പെട്ട കേസിൽ കോടതി കുറ്റവിമുക്തനാക്കിയതിന് പിന്നാലെ അന്വേഷണ ഉദ്യോഗസ്ഥർക്കെതിരെ നിയമനടപടിക്കൊരുങ്ങി ദിലീപ്. തെറ്റായ പ്രോസിക്യൂഷനെതിരെയാണ് ദിലീപ് നിയമനടപടിക്ക് നീങ്ങുന്നത്. തനിക്കെതിരെ ഗൂഢാലോചന നടന്നുവെന്നും പൊലീസ് കള്ളക്കഥ മെനഞ്ഞുവെന്നും ദിലീപ് കഴിഞ്ഞ ദിവസം ആരോപിച്ചിരുന്നു. മാദ്ധ്യമങ്ങളോടായിരുന്നു താരത്തിന്റെ പ്രതികരണം.
ഡിസംബർ 12-നാണ് ഒന്ന് മുതൽ ആറ് വരെയുള്ള പ്രതികളുടെ ശിക്ഷാവിധി പുറത്തുവരുന്നത്. അതിന് ശേഷമായിരിക്കും ദിലീപിന്റെ തുടർനീക്കങ്ങൾ. തന്നെ കുടുക്കാന്‍ ബോധപൂര്‍വമായ ശ്രമങ്ങള്‍ ഉണ്ടായിട്ടുണ്ടെന്നും ഗൂഢാലോചനയുടെ ഇര താനാണെന്നും ദിലീപ് പ്രതികരിച്ചിരുന്നു.
എറണാകുളം പ്രിൻസിപ്പൽ സെഷൻസ് കോടതിയാണ് ദിലീപിനെ കുറ്റവിമുക്തനാക്കിയത്. ഗൂഢാലോചന തെളിയിക്കാൻ പ്രോസിക്യൂഷന് സാധിച്ചിട്ടില്ലെന്ന് കോടതി വ്യക്തമാക്കുകയായിരുന്നു.
