കോട്ടയം: ജില്ലയിലും ബിജെപിക്ക് നേട്ടം. തദ്ദേശ തെരഞ്ഞെടുപ്പിൽ കിടങ്ങൂർ, പൂഞ്ഞാർ തെക്കേക്കര, അയ്മനം പഞ്ചായത്തുകളാണ് ബിജെപി നേടിയത്. കഴിഞ്ഞതവണ അയ്മനം പഞ്ചായത്തിൽ ഏഴു വാർഡുകളിൽ വിജയിച്ചിരുന്ന ബിജെപി ഇത്തവണ ഒമ്പതു സീറ്റുകൾ നേടി.
പി. സി ജോർജിന്റെയും ഷോൺ ജോർജിന്റെയും സ്ഥലമായ പൂഞ്ഞാർ തെക്കേക്കരയിൽ ആകെയുള്ള 15 സീറ്റുകളിൽ എട്ടു സീറ്റുകൾ നേടിയാണ് ബിജെപി ഭരണം പിടിച്ചത്. എൽഡിഎഫ് അഞ്ചിലും യുഡിഎഫ് രണ്ടു സീറ്റിലുമാണ് വിജയിച്ചത്.
കിടങ്ങൂർ പഞ്ചായത്തിൽ ഏഴു സീറ്റ് നേടിയാണ് ബിജെപി ഭരണം പിടിച്ചത്. യുഡിഎഫ് അഞ്ചു സീറ്റിലും എൽഡിഎഫ് നാലു സീറ്റിലും വിജയിച്ചു. 2020 ൽ തെരഞ്ഞെടുപ്പിൽ ബിജെപി ഇവിടെ രണ്ടാം സ്ഥാനത്തായിരുന്നു















