തിരുവനന്തപുരം: പ്രധാനമന്ത്രി നരേന്ദ്രമോദി 45 ദിവസത്തിനകം തിരുവനന്തപുരത്തെത്തുമെന്ന് ബി.ജെ.പി സംസ്ഥാന സെക്രട്ടറി വി. വി രാജേഷ്. തിരുവനന്തപുരം കോർപ്പറേഷൻ മേയർ ആരാകും എന്നത് സംബന്ധിച്ച് പാർട്ടി തീരുമാനമെടുക്കുമെന്നും അദ്ദേഹം പറഞ്ഞു.
സംസ്ഥാന സർക്കാരിനെതിരെയുള്ള വിധിയെഴുത്താണ് കോർപ്പറേഷനിൽ കണ്ടത്. ഇത് ജനങ്ങളുടെ വിജയമാണ്. ബിജെപി ഉൾപ്പെടെയുള്ള ദേശീയ സ്ഥാപനങ്ങളാണ് ഈ തെരഞ്ഞെടുപ്പിൽ നേട്ടം കൊയ്തത്. ആശയപരമായ ഒരു സ്വപ്നം മുന്നിൽവച്ച് കഴിഞ്ഞ കുറെ വർഷങ്ങളായി നഷ്ടങ്ങൾ സഹിച്ച് പാർട്ടിയെ കൊണ്ടുനടന്ന പ്രവർത്തകരുണ്ട്. ഇത് അവരുടെ വിജയമാണ്.
തിരുവനന്തപുരത്തെ സ്നേഹിക്കുന്ന ജനങ്ങളുടെ വിജയമാണിത്. ആ വിജയം ഞങ്ങൾ കണ്ണിലെ കൃഷ്ണമണി പോലെ കാത്തുസൂക്ഷിക്കും. 45 ദിവസത്തിനകം പ്രധാനമന്ത്രി നരേന്ദ്രമോദിയെ തലസ്ഥാനത്തെത്തിക്കും. ബിജെപി സംസ്ഥാന അദ്ധ്യക്ഷൻ പ്രഖ്യാപിച്ച കാര്യമാണിത്. ബിജെപി സംസ്ഥാന കമ്മിറ്റി ഓഫീസും പ്രധാനമന്ത്രിയുടെ ഓഫീസുമായി അതിന് വേണ്ട ചർച്ചകൾ തുടങ്ങിയിട്ടുണ്ട്.
കേരളത്തെ സംബന്ധിച്ച് പൂച്ചയ്‌ക്കാര് മണികെട്ടും എന്ന ചോദ്യത്തിന് ഉത്തരമായിരിക്കുന്നു. പൂച്ചയ്‌ക്ക് തിരുവനന്തപുരം മണികെട്ടും. തിരുവനന്തപുരം മേയർ ആരാകും എന്നത് സംബന്ധിച്ച് വിവരങ്ങൾ ബിജെപി സംസ്ഥാന അദ്ധ്യക്ഷൻ പറയും. നൽകിയ വാഗ്ദാനങ്ങൾ നടപ്പിലാക്കാൻ സാധിക്കുന്ന ഒരു ഭരണസമിതിയായിരിക്കും കോർപ്പറേഷനിൽ അധികാരത്തിൽ വരികയെന്നും വി വി രാജേഷ് പറഞ്ഞു.
