പഴനി : പഴനി ദണ്ഡായുധപാണി ക്ഷേത്രത്തിലെ പൊതു അറിയിപ്പ് കേന്ദ്രത്തിൽ അതിക്രമിച്ചുകയറിയ യുവാവ് സ്പീക്കറിലൂടെ നടൻ വിജയ്യുടെ ഗാനം ഉച്ചത്തിൽ കേൾപ്പിച്ച സംഭവം വിവാദമാകുന്നു. ഗാനം പ്ലേ ചെയ്യുന്നതിന്റെ വീഡിയോ സോഷ്യൽ മീഡിയയിൽ പ്രചരിച്ചതിനെത്തുടർന്ന് ക്ഷേത്രം അധികൃതർ പരാതി നൽകി. തുടർന്ന് പോലീസ് കേസെടുത്തു.
പഴനി ക്ഷേത്രത്തിലെ ആനപ്പാത എന്നറിയപ്പെടുന്ന ഭാഗത്താണ് സംഭവം നടന്നത്. സുരക്ഷാ അറിയിപ്പുകൾക്കും ഭക്തിഗാനങ്ങൾക്കുമായി ഉപയോഗിക്കുന്ന മൈക്രോഫോൺ സ്റ്റേഷനിൽ ഉദ്യോഗസ്ഥർ ഇല്ലാത്ത സമയം നോക്കി അജ്ഞാതനായ യുവാവ് അകത്തുകടന്നു. തുടർന്ന് ഇയാൾ തന്റെ മൊബൈൽ ഫോൺ ബന്ധിപ്പിക്കുകയും വിജയ്യുടെ പാട്ട് ഉച്ചത്തിൽ പ്ലേ ചെയ്യുകയുമായിരുന്നു. വിജയ് രൂപീകരിച്ച തമിഴക വെട്രി കഴകം (TVK) എന്ന രാഷ്ട്രീയ പാർട്ടിയുടെ പ്രചാരണത്തിനായി ഉപയോഗിക്കുന്ന ഗാനമാണ് ക്ഷേത്രത്തിൽ മുഴങ്ങിയത്.
സംഭവത്തിന്റെ വീഡിയോ സോഷ്യൽ മീഡിയയിൽ വൈറലായതോടെ ക്ഷേത്രം അധികൃതർ പോലീസിനെ സമീപിച്ചു. വീഡിയോയിൽ ചില ഭക്തർ യുവാവിനെ എതിർക്കുന്നത് കാണാം. ക്ഷേത്രത്തിലെ ശാന്തമായ അന്തരീക്ഷത്തിൽ ഇത്തരമൊരു ഗാനം കേട്ട് ഭക്തർ അമ്പരന്നു. ക്ഷേത്രത്തിലെ സുരക്ഷാ വീഴ്ചയെക്കുറിച്ച് അധികൃതർ ആഭ്യന്തര അന്വേഷണത്തിന് ഉത്തരവിട്ടിട്ടുണ്ട്.
യുവാവിനെ തിരിച്ചറിഞ്ഞിട്ടില്ല. ബിഎൻഎസ് സെക്ഷൻ 299, സെക്ഷൻ 302 എന്നീ വകുപ്പുകൾ പ്രകാരം എഫ്ഐആർ രജിസ്റ്റർ ചെയ്തു. യുവാവിനെയും സഹായികളെയും തിരിച്ചറിയാനുള്ള ശ്രമങ്ങൾ തുടരുകയാണെന്ന് പൊലീസ് പറഞ്ഞു.
