തിരുവനന്തപുരം: സംസ്ഥാനത്തെ വിവിധ ജില്ലകളില് അള്ട്രാവയലറ്റ് വികിരണത്തിന്റെ തോത് അപകടകരമായ രീതിയില് ഉയരുന്നതായി റിപ്പോർട്ട്. കഴിഞ്ഞ ഒരു ദിവസത്തെ കണക്കനുസരിച്ച് ഇടുക്കി ജില്ലയിലെ മൂന്നാര്, ആലപ്പുഴ ജില്ലയിലെ ചെങ്ങന്നൂര് എന്നിവിടങ്ങളിലാണ് ഏറ്റവും ഉയര്ന്ന യുവി ഇന്ഡക്സ് (8) രേഖപ്പെടുത്തിയത്. ജാഗ്രതയുടെ ഭാഗമായി ഇവിടെ ഓറഞ്ച് അലര്ട്ട് പ്രഖ്യാപിച്ചിട്ടുണ്ട്. ചങ്ങനാശേരിയില് യുവി ഇന്ഡക്സ് 7 രേഖപ്പെടുത്തി.
യുവി ഇന്ഡക്സ് 6നു മുകളിലുള്ള പ്രദേശങ്ങളില് ഉള്ളവര് പുറത്തിറങ്ങുമ്പോള് മുന്കരുതലെടുക്കണമെന്നാണു നിര്ദേശം.
പകല് 10 മുതല് 3 വരെയുള്ള സമയങ്ങളിലാണ് ഉയര്ന്ന അള്ട്രാവയലറ്റ് സൂചിക രേഖപ്പെടുത്തപ്പെടുന്നത്. അതിനാല് ആ സമയങ്ങളില് കൂടുതല് നേരം ശരീരത്തില് നേരിട്ട് സൂര്യപ്രകാശം ഏല്ക്കുന്നതു പരമാവധി ഒഴിവാക്കണമെന്നു നിര്ദേശമുണ്ട്.
ഫെബ്രുവരി 12 മുതല് മേയ് 20 വരെ ജോലി സമയം പുനഃക്രമീകരിച്ച് ലേബര് കമ്മിഷണര് ഉത്തരവിറക്കിയിട്ടുണ്ട്. പകല് സമയം വെയിലത്ത് ജോലി ചെയ്യുന്ന എല്ലാ തൊഴിലാളികള്ക്കും ഉച്ചയ്ക്ക് 12 മുതല് 3 വരെ വിശ്രമവേളയായിരിക്കും. ഇവരുടെ ജോലി സമയം രാവിലെ 7 മുതല് വൈകുന്നേരം 7 വരെയുള്ള സമയത്തിനുള്ളില് 8 മണിക്കൂറായി നിജപ്പെടുത്തി.
