ഹയർ സെക്കൻഡറി ഒന്നാം വർഷ മോഡൽ പരീക്ഷ ചോദ്യപേപ്പർ ഇപ്പോൾ സമൂഹമാധ്യമങ്ങളിൽ വൈറലായിക്കൊണ്ടിരിക്കുകയാണ്. കഴിഞ്ഞ ദിവസം നടന്ന ഇംഗ്ലിഷ് പരീക്ഷയിലാണ് മോഹൻ ലാലിനെക്കുറിച്ച് പ്രൊഫൈൽ തയാറാക്കാനുള്ള ചോദ്യം വന്നത്. സാധാരണഗതിയിൽ വിദേശ എഴുത്തുകാരെയോ പ്രശസ്തരായ ശാസ്ത്രജ്ഞരെയോ കുറിച്ചാണ് പ്രൊഫൈൽ ചോദ്യങ്ങളിൽ വരാറുള്ളത്. എന്നാൽ സിനിമാപ്രേമികൾക്ക് ഏറെ സുപരിചിതനായ ലാലേട്ടനെക്കുറിച്ച് ജീവചരിത്രമെഴുതാൻ വന്നത് വിദ്യാർത്ഥികൾക്ക് ഏറെ ആശ്വാസവും ആവേശവുമായി.
1960 ലെ ഇലന്തൂരിലെ അദ്ദേഹത്തിന്റെ ജനനം മുതൽ ആദ്യത്തെ സിനിമയെയും ലഭിച്ച അവാർഡുകളെയും വരാനിരിക്കുന്ന സിനിമകളെക്കുറിച്ച് വരെ സൂചകങ്ങളായി ചോദ്യപേപ്പറിൽ ഉണ്ടായിരുന്നു. ചോദ്യപേപ്പറിൽ വരുന്ന തെറ്റുകൾ വിദ്യാർത്ഥികൾ കണ്ടുപിടിക്കുന്നതും അവ തിരുത്തുന്നതും പതിവാണെങ്കിലും ലാലേട്ടന്റെ സിനിമയെക്കുറിച്ച് വന്ന തെറ്റ് തിരുത്താൻ വിദ്യാർത്ഥികൾക്ക് ഏറെ ഉൽസാഹമായിരുന്നു.
1978ൽ ‘തിരനോട്ടം’ സിനിമയിലൂടെയാണ് മോഹൻലാൽ അഭിനയരംഗത്തെത്തിയതെന്നും ‘മഞ്ഞിൽ വിരിഞ്ഞ പൂക്കൾ’ റിലീസ് ചെയ്തത് 1980ലാണെന്നും വിദ്യാർഥികൾ തിരുത്തി.
ജനപ്രിയ സംസ്കാരവും ഭാഷ പഠനവും തമ്മിൽ ബന്ധിപ്പിക്കുന്ന പഠനരീതി കുട്ടികളിൽ സർഗ്ഗ ശേഷിയും എഴുത്തിനോടുള്ള താല്പര്യവും വർധിപ്പിക്കുമെന്നാണ് അധ്യാപകർ പറയുന്നത്. വരാൻപോകുന്ന വാർഷിക പരീക്ഷയ്ക്ക് ഈ മോഡൽ പരീക്ഷ വലിയ ആത്മവിശ്വാസം നൽകാൻ സഹായകമായെന്നും അധ്യാപകർ കൂട്ടിച്ചേർത്തു.
