ദുബായ് : പശ്ചിമേഷ്യയിലെ സംഘർഷത്തെത്തുടർന്ന് സാഹചര്യങ്ങൾ വഷളാകുന്ന പശ്ചാത്തലത്തിൽ, വ്യോമപാത അടച്ചതിനാൽ തമിഴ് നടൻ അജിത്ത് കുമാർ ദുബായിൽ കുടുങ്ങി. സംഘർഷത്തെ തുടർന്ന് മിഡിൽ ഈസ്റ്റ് മേഖലയിലെ നിരവധി വിമാന സർവീസുകൾ റദ്ദാക്കിയ സാഹചര്യത്തിലാണ് നടന്റെ യാത്ര മുടങ്ങിയത്.നടൻ സുരക്ഷിതനാണെന്ന് അജിത്തിന്റെ മാനേജർ അറിയിച്ചു.
ദുബായിൽ കുടുങ്ങിക്കിടക്കുന്ന യാത്രക്കാരുടെ വാർത്തകൾ പുറത്തുവന്നതോടെ, അജിത്തിന്റെ സുരക്ഷയെക്കുറിച്ച് ആരാധകർക്കിടയിൽ ആശങ്ക ഉയർന്നിരുന്നു. ഇതിനിടെ താരം സുരക്ഷിതനാണെന്നും ആരാധകർ ആശങ്കപ്പെടേണ്ടതില്ലെന്നും മാനേജർ വ്യക്തമാക്കി. വിമാന സർവീസുകൾ പുനരാരംഭിക്കുന്ന മുറയ്‌ക്ക് നടൻ ചെന്നൈയിലേക്ക് മടങ്ങും.
റേസിങ്ങുമായി ബന്ധപ്പെട്ട കാര്യങ്ങൾക്കായാണ് അജിത് അടുത്തിടെ ദുബായിലെത്തിയത്.അബുദാബിയിൽ വരാനിരിക്കുന്ന റേസിംഗ് ഇവന്റുകൾക്കായി അദ്ദേഹം കഠിനമായ പരിശീലനത്തിലായിരുന്നു. റേസിങ് ഷെഡ്യൂൾ പൂർത്തിയാക്കിയ ശേഷം ആദിക് രവിചന്ദ്രൻ സംവിധാനം ചെയ്യുന്ന പുതിയ തമിഴ് ചിത്രത്തിൽ അഭിനയിക്കാൻ ഒരുങ്ങുകയാണ് അജിത്ത്.
