പെരുമ്പാവൂര്‍: പ്ലൈവുഡ് കമ്പനിയില്‍ മോഷണം ആരോപിച്ച് ഇതര സംസ്ഥാന തൊഴിലാളിയെ ക്രൂരമായി മര്‍ദ്ദിച്ചു കൊലപ്പെടുത്തി. പെരുമ്പാവൂര്‍ മുടിക്കലിലെ ‘എ എം വിനീര്‍’ എന്ന സ്ഥാപനത്തിലാണ് ഞെട്ടിപ്പിക്കുന്ന സംഭവം നടന്നത്. കൊല്ലപ്പെട്ടയാളെ ഇതുവരെ തിരിച്ചറിഞ്ഞിട്ടില്ല. സംഭവുമായി ബന്ധപ്പെട്ട് ആറ് ഇതര സംസ്ഥാന തൊഴിലാളികളെ പെരുമ്പാവൂര്‍ പോലീസ് കസ്റ്റഡിയിലെടുത്തു.
ചൊവ്വാഴ്ച രാത്രിയാണ് കേസിനാസ്പദമായ സംഭവം നടന്നത്. തൊഴിലാളികള്‍ താമസിക്കുന്ന മുറിയില്‍ നിന്നും മൊബൈല്‍ ഫോണ്‍ മോഷ്ടിക്കാന്‍ ശ്രമിച്ചു എന്നാരോപിച്ചായിരുന്നു ആക്രമണം. മൂന്ന് സഹോദരങ്ങള്‍ ഉള്‍പ്പെടെയുള്ള ആറംഗ സംഘമാണ് മര്‍ദ്ദനത്തിന് പിന്നിലെന്ന് പോലീസ് പറഞ്ഞു.
പ്ലൈവുഡ് കമ്പനിയിലെ കോര്‍ ഉപയോഗിച്ചാണ് യുവാവിനെ മര്‍ദ്ദിച്ചത്. മുഖത്തും വയറിലും കൈകാലുകളിലും ഗുരുതരമായ പരിക്കേറ്റു. ക്രൂരമായ മര്‍ദ്ദനത്തില്‍ യുവാവിന്റെ പല്ലുകള്‍ ഒടിഞ്ഞുപോയിട്ടുണ്ട്. കൊലപാതകത്തിന് പിന്നാലെ കമ്പനിയില്‍ നിന്നുതന്നെ പ്രതികളെ പോലീസ് പിടികൂടി. അസാം സ്വദേശികളാണ് പിടിയിലായവര്‍.
അലാവുദ്ദീന്‍, മിനാരുള്‍, സാക്കിര്‍ ഹുസൈന്‍, ഹബീസുദീന്‍, ഹസന്‍ അലി, മുസമ്മില്‍ എന്നിവരാണ് കസ്റ്റഡിയില്‍ ഉള്ളത്. കൊല്ലപ്പെട്ടയാളെ തിരിച്ചറിയാനുള്ള ശ്രമങ്ങള്‍ പോലീസ് ഊര്‍ജ്ജിതമാക്കിയിട്ടുണ്ട്.
മൃതദേഹം നിലവില്‍ പെരുമ്പാവൂരിലെ സ്വകാര്യ ആശുപത്രി മോര്‍ച്ചറിയില്‍ സൂക്ഷിച്ചിരിക്കുകയാണ്. പെരുമ്പാവൂര്‍ പോലീസ് സംഭവത്തില്‍ വിശദമായ അന്വേഷണം നടത്തിവരികയാണ്. നിയമം കൈയ്യിലെടുക്കുന്ന ഇത്തരം സംഭവങ്ങള്‍ ഇതര തൊഴിലാളികള്‍ക്കിടയില്‍ വര്‍ദ്ധിച്ചു വരുന്നത് വലിയ ആശങ്കയ്‌ക്കാണ് ഇടയാക്കുന്നത്.
