കോഴിക്കോട്: ചക്കയിടാനായി പ്ലാവില് കയറുന്നതിനിടെ താഴെ വീണ് കാസര്കോട് സ്വദേശിക്ക് ദാരുണാന്ത്യം. താമരശ്ശേരി അടിവാരം മുപ്പതേക്കറില് താമസിക്കുന്ന ഇബ്രാഹിം ആണ് ബുധനാഴ്ച രാവിലെ മരിച്ചത്. ഏറെക്കാലമായി താമരശ്ശേരിയില് സ്ഥിരതാമസക്കാരനായിരുന്നു ഇദ്ദേഹം. ബുധനാഴ്ച രാവിലെ പത്തുമണിയോടെയായിരുന്നു സംഭവം. താമസസ്ഥലത്തിന് സമീപമുള്ള സുഹൃത്തിന്റെ പറമ്പിലെ പ്ലാവില് ചക്കയിടാനായി കയറിയതായിരുന്നു ഇബ്രാഹിം.
ഏണി ഉപയോഗിച്ച് പ്ലാവില് കയറുന്നതിനിടെ അപ്രതീക്ഷിതമായി പിടിവിട്ട് താഴേക്ക് പതിക്കുകയായിരുന്നു. അപകടം നടന്ന ഉടനെ പരിസരത്തുണ്ടായിരുന്ന മറ്റ് തൊഴിലാളികള് ചേര്ന്ന് ഇബ്രാഹിമിനെ കോഴിക്കോട് മെഡിക്കല് കോളേജ് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. നിലവില് മൃതദേഹം മെഡിക്കല് കോളേജ് മോര്ച്ചറിയില് സൂക്ഷിച്ചിരിക്കുകയാണ്.
കാസര്കോട്ടുള്ള ബന്ധുക്കള് എത്തിയ ശേഷം പോസ്റ്റ്മോര്ട്ടം നടപടികള് പൂര്ത്തിയാക്കി മൃതദേഹം വിട്ടുനല്കുമെന്ന് അധികൃതര് അറിയിച്ചു. വര്ഷങ്ങളായി അടിവാരം മേഖലയില് സുപരിചിതനായ ഇബ്രാഹിമിന്റെ അപ്രതീക്ഷിത വിയോഗം നാട്ടുകാരെയും സുഹൃത്തുക്കളെയും ദുഃഖത്തിലാഴ്ത്തി.
