പെരിന്തല്മണ്ണ: ജില്ലാ ആശുപത്രിയിലെ സീനിയര് ഗൈനക്കോളജിസ്റ്റ് ഡോ. സിനി ജലീലിന് നേരെ ആക്രമണം നടത്തിയതായി പരാതി. ഡോക്ടറുടെ പെരിന്തല്മണ്ണയിലെ വീട്ടിലെ പരിശോധനാ മുറിയില് വച്ചാണ് മര്ദ്ദിച്ചതെന്ന് പോലീസിന് നല്കിയ പരാതിയില് പറയുന്നു. രോഗിയുടെ ബന്ധുക്കളായ നാല് പേര് ചേര്ന്നാണ് ഡോക്ടറെ മര്ദ്ദിച്ചത്. ഇവരില് രണ്ട് പേര് സ്ത്രീകളായിരുന്നു. എന്നാല് മുഖം മൂടുന്ന തരത്തില് പര്ദ്ദ ധരിച്ചതിനാല് ഇവരെ തിരിച്ചറിയാന് സാധിച്ചില്ല. മൂക്കിനുള്പ്പെടെ പരിക്കേറ്റ ഡോക്ടര് പെരിന്തല്മണ്ണയിലെ സ്വകാര്യ ആശുപത്രിയില് ചികിത്സയിലാണ്.
ഡോക്ടര്ക്കെതിരെയുള്ള അതിക്രമത്തില് ഐ.എം.എ. പെരിന്തല്മണ്ണ ഘടകം ശക്തമായ പ്രതിഷേധം രേഖപ്പെടുത്തി. സംയുക്ത സമരസമിതിയുടെ നേതൃത്വത്തില് പ്രദേശത്തെ ആശുപത്രികളില് ഒ.പി. ബഹിഷ്കരിച്ച് സമരം നടത്താനാണ് തീരുമാനം. കഴിഞ്ഞ മാര്ച്ച് 19-ന് ജില്ലാ ആശുപത്രിയില് പ്രസവിച്ച ഒരു യുവതി, പ്രസവാനന്തര രക്തസ്രാവത്തെത്തുടര്ന്ന് സ്വകാര്യ ആശുപത്രിയിലേക്ക് മാറ്റിയിരുന്നു. തുടര്ന്ന് ഈ യുവതി 23ന് മരിക്കുകയും ചെയ്തു. ഈ സംഭവത്തിന്റെ തുടര്ച്ചയായാണ് ഡോക്ടര്ക്ക് നേരെയുള്ള ആക്രമണമെന്ന് കരുതപ്പെടുന്നു.
രണ്ട് പുരുഷന്മാരും മുഖം മറച്ചെത്തിയ രണ്ട് സ്ത്രീകളുമാണ് സംഘത്തിലുണ്ടായിരുന്നത്. അക്രമം തടയാന് ശ്രമിച്ച ഡോക്ടറുടെ സഹായിക്കും ജീവനക്കാരിക്കും പരിക്കേറ്റിട്ടുണ്ട്. സംഭവത്തില് പെരിന്തല്മണ്ണ പോലീസ് എഫ്.ഐ.ആര്. രജിസ്റ്റര് ചെയ്ത് അന്വേഷണം ഊര്ജിതമാക്കിയിട്ടുണ്ട്. അക്രമികളെ തിരിച്ചറിയാനുള്ള ശ്രമങ്ങള് നടന്നുവരികയാണെന്ന് പോലീസ് അറിയിച്ചു.
