മുന്‍ ഇന്ത്യന്‍ നായകന്മാരായ കപില്‍ ദേവിനും എം.എസ്. ധോണിക്കുമെതിരെ പിതാവ് യോഗ്രാജ് സിങ് നടത്തിയ കടുത്ത വിമര്‍ശനങ്ങളില്‍ ഖേദം പ്രകടിപ്പിച്ച് മകനും മുന്‍ ഇന്ത്യന്‍ ഓള്‍റൗണ്ടറുമായ യുവരാജ് സിങ്. ഇത്തരം കാര്യങ്ങള്‍ പരസ്യമായി പറയുന്നത് ശരിയല്ലെന്ന് താന്‍ പിതാവിനോട് നേരത്തെ തന്നെ പറഞ്ഞിട്ടുള്ളതാണെന്നും യുവരാജ് വ്യക്തമാക്കി.
തന്റെ ക്രിക്കറ്റ് കരിയര്‍ അവസാനിപ്പിക്കാന്‍ കാരണം കപില്‍ ദേവാണെന്നായിരുന്നു യോഗ്രാജിന്റെ ആരോപണം. ലോകം നിങ്ങളെ വെറുക്കുന്ന അവസ്ഥയിലേക്ക് താന്‍ എത്തിക്കുമെന്ന് കപിലിനോട് നേരിട്ട് പറഞ്ഞതായും അദ്ദേഹം അവകാശപ്പെട്ടിരുന്നു. യുവരാജ് സിങ്ങിന്റെ കരിയര്‍ നശിപ്പിച്ചത് ധോണിയാണെന്നും ഇതിന് താന്‍ ഒരിക്കലും ധോണിയോട് ക്ഷമിക്കില്ലെന്നുമാണ് യോഗ്രാജ് പറഞ്ഞത്. ധോണി സ്വന്തം മുഖം കണ്ണാടിയില്‍ നോക്കണമെന്നും അദ്ദേഹം ആഞ്ഞടിച്ചിരുന്നു.
തുടര്‍ച്ചയായി പിതാവ് വിവാദങ്ങള്‍ സൃഷ്ടിക്കുന്ന പശ്ചാത്തലത്തിലാണ് യുവരാജ് സ്‌പോര്‍ട്‌സ് ടാക്കിന് നല്‍കിയ വീഡിയോയിലൂടെ തന്റെ നിലപാട് വ്യക്തമാക്കിയത്. കപില്‍ ദേവിനോടും ധോണിയോടും താന്‍ ക്ഷമ ചോദിക്കുന്നതായും പിതാവിന്റെ ശൈലിയെ താന്‍ അംഗീകരിക്കുന്നില്ലെന്നും യുവി പറഞ്ഞു.
വിരാട് കോലി, സഞ്ജു സാംസണ്‍, യുവതാരം വൈഭവ് സൂര്യവംശി എന്നിവരെ കുറിച്ചുള്ള തന്റെ നിരീക്ഷണങ്ങളും ഈ വീഡിയോയില്‍ യുവരാജ് പങ്കുവെക്കുന്നുണ്ട്. കുടുംബാംഗങ്ങളാണെങ്കില്‍ പോലും തെറ്റ് ചെയ്താല്‍ ക്ഷമിക്കില്ലെന്ന കടുത്ത നിലപാടിലായിരുന്നു യോഗ്രാജ്. എന്നാല്‍ ഈ വിവാദങ്ങളില്‍ നിന്ന് അകലം പാലിക്കാനാണ് യുവരാജ് സിങ് ഇപ്പോള്‍ ശ്രമിക്കുന്നത്.
