ന്യൂഡല്ഹി: പശ്ചിമേഷ്യയില് യുദ്ധം കൊടുമ്പിരിക്കൊള്ളുമ്പോഴും ലോകത്തെ ഏറ്റവും അപകടം പിടിച്ച കപ്പല്പ്പാതയായ ഹോര്മുസ് കടലിടുക്കിലൂടെ ഭാരതീയ പതാകയേന്തിയ കപ്പലുകള് സുരക്ഷിതമായി പ്രയാണം തുടരുന്നു. ഏറ്റവും ഒടുവിലായി ‘ഗ്രീന് ആശ’ എന്ന എല്പിജി ടാങ്കര് ഇറാനിയന് ഉപരോധങ്ങളെയും സുരക്ഷാ ഭീഷണികളെയും മറികടന്ന് ലക്ഷ്യസ്ഥാനത്തെത്തി. സംഘര്ഷം ആരംഭിച്ച ശേഷം ഈ പാതയിലൂടെ സുരക്ഷിതമായി കടന്നുപോകുന്ന ഒമ്പതാമത്തെ ഇന്ത്യന് ടാങ്കറാണിത്.
അന്താരാഷ്ട്ര തലത്തില് ഇന്ധന വിപണികള് വിറങ്ങലിച്ചു നില്ക്കുമ്പോഴും ഇന്ത്യയുടെ ഊര്ജ്ജ ആവശ്യങ്ങള് തടസ്സപ്പെടാതിരിക്കാന് പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള സര്ക്കാര് നടത്തുന്ന ഇടപെടലുകള് ലോകശ്രദ്ധ നേടുകയാണ്. ഹോര്മുസ് കടലിടുക്കില് ഇറാന് നിയന്ത്രണം കടുപ്പിച്ചിട്ടുണ്ടെങ്കിലും, ഭാരതീയ കപ്പലുകളുടെ സുരക്ഷിത സഞ്ചാരം ഉറപ്പാക്കാന് മോദി സര്ക്കാര് ഇറാനിയന് അധികൃതരുമായി നിരന്തര സമ്പര്ക്കം പുലര്ത്തുന്നുണ്ട്. ഇന്ത്യന് നാവികസേനയുടെ യുദ്ധക്കപ്പലുകള് ടാങ്കറുകള്ക്ക് കാവലൊരുക്കി സമുദ്രത്തിലുടനീളം സജീവമാണ്. സമുദ്ര സുരക്ഷയില് ഭാരതം കൈവരിച്ച സ്വാധീനം കപ്പലുകളുടെ നിര്ഭയമായ യാത്രയ്ക്ക് കരുത്തേകുന്നു.
ഗ്രീന് ആശയ്ക്ക് മുന്പായി എട്ട് ഇന്ത്യന് കപ്പലുകള് ഈ മേഖലയിലൂടെ വിജയകരമായി കടന്നുപോയി. മാര്ച്ച് 26-28 തീയതികളില് പൈന് ഗ്യാസ്, ജഗ് വസന്ത് എന്നീ ടാങ്കറുകള് 92,612 ടണ് എല്പിജി എത്തിച്ചിരുന്നു. മാര്ച്ച് 16-17 തീയതികളില് എംടി ഷിവാജിക്, എംടി നന്ദാദേവി എന്നിവ ഗുജറാത്തിലെ മുന്ദ്ര, കണ്ട്ല തുറമുഖങ്ങളില് ഇന്ധനമെത്തിച്ചു. ജഗ് ലാഡ്കി, ജഗ് പ്രകാശ്, ബിഡബ്ല്യു ടൈര്, ബിഡബ്ല്യു എല്എം, ഗ്രീന് സാന്വി തുടങ്ങിയ മറ്റ് കപ്പലുകളും ഇതില് ഉള്പ്പെടുന്നു.
യുഎസ്-ഇസ്രയേല് ആക്രമണങ്ങള്ക്ക് ശേഷം ഹോര്മുസ് കടലിടുക്കിലെ ഗതാഗതം 60 ശതമാനവും ഇറാനുമായി ബന്ധപ്പെട്ട കപ്പലുകള്ക്ക് മാത്രമായി പരിമിതപ്പെട്ട സാഹചര്യത്തിലാണ് ഇന്ത്യയുടെ ഈ നേട്ടം. ശത്രുതയില്ലാത്ത രാജ്യങ്ങളുടെ കപ്പലുകളെ അനുവദിക്കാമെന്ന ഇറാന്റെ നിലപാട് അനുകൂലമാക്കിയെടുക്കാന് മോദി സര്ക്കാരിന്റെ വിദേശനയത്തിന് സാധിച്ചു.
ബാബ് എല്-മാന്ഡെബ് ഉള്പ്പെടെയുള്ള മറ്റ് പാതകളിലും സമ്മര്ദ്ദം ചെലുത്തുമെന്ന് ഇറാന് മുന്നറിയിപ്പ് നല്കുന്നുണ്ടെങ്കിലും, ഭാരതീയ പൗരന്മാരുടെയും ചരക്കുകളുടെയും സുരക്ഷ ഉറപ്പാക്കാന് കേന്ദ്ര സര്ക്കാര് സജ്ജമാണെന്ന് ഈ ദൗത്യങ്ങള് തെളിയിക്കുന്നു. ആഗോള പ്രതിസന്ധികള്ക്കിടയിലും ഭാരതത്തിന്റെ അടുക്കളകളില് ഇന്ധനമെത്തുന്നുണ്ടെങ്കില് അത് മോദി സര്ക്കാരിന്റെ ഉറച്ച നയതന്ത്രത്തിന്റെ ‘ഗ്യാരണ്ടി’ ആണെന്ന് ഈ വിജയകരമായ കപ്പല് യാത്രകള് അടിവരയിടുന്നു.
