കൊച്ചി: അഞ്ചു പതിറ്റാണ്ടിന്റെ സാംസ്കാരിക പാരമ്പര്യം പിന്നിടുന്ന ബാലഗോകുലത്തിന്റെ സുവര്ണ്ണ ജയന്തി ആഘോഷങ്ങള്ക്ക് എറണാകുളം എളമക്കരയില് സമാപനമായി. രാഷ്ട്രീയ സ്വയംസേവക സംഘം സര്സംഘചാലക് മോഹന് ഭാഗവത് മുഖ്യാതിഥിയായ ചടങ്ങില് ഗവര്ണ്ണര് രാജീവ് അര്ലേക്കറും പങ്കെടുത്തു. ഭാസ്കരീയത്തില് നടന്ന ചടങ്ങില് കേരളത്തിന്റെ വിവിധ ഭാഗങ്ങളില് നിന്നുള്ള ആയിരക്കണക്കിന് പ്രതിനിധികളാണ് അണിനിരന്നത്.
കേരളത്തിലെ ഓരോ താലൂക്കില് നിന്നും തിരഞ്ഞെടുക്കപ്പെട്ട ഏഴ് ഹൈസ്കൂള് വിദ്യാര്ത്ഥികള് വീതം ചടങ്ങില് പ്രത്യേക പ്രതിനിധികളായി എത്തി. സമാപന സമ്മേളനത്തിന്റെ സുഗമമായ നടത്തിപ്പിനായി 3500-ഓളം സന്നദ്ധ പ്രവര്ത്തകര് രംഗത്തുണ്ടായിരുന്നു. പുതുതലമുറയില് ധാര്മ്മിക മൂല്യങ്ങളും ഭാരതീയ സംസ്കാരവും വളര്ത്തിയെടുക്കുന്നതില് ബാലഗോകുലം വഹിക്കുന്ന പങ്കിനെ ചടങ്ങില് നേതാക്കള് പ്രശംസിച്ചു.
സംസ്ഥാനത്ത് തിരഞ്ഞെടുപ്പ് പ്രചാരണം അവസാന ഘട്ടത്തിലേക്ക് കടക്കുന്ന വേളയില് ആര്എസ്എസ് മേധാവിയുടെ കൊച്ചി സന്ദര്ശനം ഏറെ പ്രാധാന്യത്തോടെയാണ് രാഷ്ട്രീയ കേന്ദ്രങ്ങള് നോക്കിക്കാണുന്നത്. രാവിലെ 9 മണിക്ക് ആരംഭിച്ച സമാപന സമ്മേളനം ഉച്ചയോടെയാണ് അവസാനിച്ചത്. വരും ദിവസങ്ങളില് സംസ്ഥാനത്തിന്റെ വിവിധ ഭാഗങ്ങളില് സമാനമായ സാംസ്കാരിക ഒത്തുചേരലുകള്ക്ക് ഈ സംഗമം ഊര്ജ്ജം പകരുമെന്ന് സംഘാടകര് അറിയിച്ചു.
