മുംബൈ: ഐപിഎല് 19-ാം സീസണിന്റെ ആവേശത്തിനിടയില്, തന്റെ രാജ്യാന്തര കരിയര് അകാലത്തില് അവസാനിക്കാന് കാരണമായ സാഹചര്യങ്ങളെക്കുറിച്ച് മനസ്സ് തുറന്ന് മുന് ഇംഗ്ലണ്ട് നായകന് കെവിന് പീറ്റേഴ്സന്. ഐപിഎല്ലില് പങ്കെടുക്കുന്നതുമായി ബന്ധപ്പെട്ട് ഇംഗ്ലണ്ട് ആന്ഡ് വെയില്സ് ക്രിക്കറ്റ് ബോര്ഡുമായി (ഇസിബി) നിലനിന്നിരുന്ന കടുത്ത ഭിന്നതയാണ് തന്റെ കരിയര് തകര്ത്തതെന്ന് അദ്ദേഹം വെളിപ്പെടുത്തി. പ്രമുഖ യൂട്യൂബര് രണ്വീര് അല്ലാബാദിയയ്ക്ക് നല്കിയ അഭിമുഖത്തിലാണ് പീറ്റേഴ്സന് ഈ കാര്യങ്ങള് പങ്കുവെച്ചത്.
ഐപിഎല്ലിന്റെ ആദ്യകാലങ്ങളില് ഇംഗ്ലീഷ് താരങ്ങള് പങ്കെടുക്കുന്നതിനെ ഇസിബി ശക്തമായി എതിര്ത്തിരുന്നു. 2008-ല് താരങ്ങളെ വിലക്കിയ ബോര്ഡ്, 2009-ല് പീറ്റേഴ്സണ് പരിമിതമായ അനുമതി നല്കിയെങ്കിലും ഇത് വലിയ തര്ക്കങ്ങള്ക്ക് വഴിവെച്ചു. തന്നെ വ്യക്തിഹത്യ ചെയ്യാന് ഇസിബി പ്രമുഖ മാധ്യമങ്ങളെ ഉപയോഗിച്ചുവെന്നും താരം ആരോപിച്ചു. 104 ടെസ്റ്റ് മത്സരങ്ങള് കളിച്ച പീറ്റേഴ്സന് 33-ാം വയസ്സിലാണ് വിരമിച്ചത്. ബോര്ഡുമായുള്ള പ്രശ്നങ്ങള് ഇല്ലായിരുന്നുവെങ്കില് 150-ലധികം ടെസ്റ്റുകളും 13,000-ല് പരം റണ്സും തനിക്ക് നേടാമായിരുന്നുവെന്ന് അദ്ദേഹം വികാരാധീനനായി പറഞ്ഞു.
തന്റെ പോരാട്ടം പാഴായില്ലെന്നും ഇന്നത്തെ ഇംഗ്ലീഷ് താരങ്ങള് ഐപിഎല്ലില് ആസ്വദിക്കുന്ന സ്വാതന്ത്ര്യത്തിന് പിന്നില് തന്റെ ത്യാഗമുണ്ടെന്നും പീറ്റേഴ്സന് ചൂണ്ടിക്കാട്ടി. ‘കഴിഞ്ഞ ദിവസം ജോസ് ബട്ലറെ അഭിമുഖം ചെയ്തപ്പോള് അദ്ദേഹം എനിക്ക് നന്ദി പറഞ്ഞു. അന്ന് ഞാന് നടത്തിയ പോരാട്ടങ്ങളാണ് ഇന്ന് അവര്ക്ക് ഐപിഎല്ലില് കളിക്കാന് വഴിതുറന്നത്.’ – പീറ്റേഴ്സന് പറഞ്ഞു. ടെസ്റ്റ് ക്രിക്കറ്റില് 23 സെഞ്ചറികളും 35 അര്ധസെഞ്ചറികളും ഉള്പ്പെടെ 8,181 റണ്സുണ്ട്. റോയല് ചലഞ്ചേഴ്സ് ബാംഗ്ലൂര്, ഡല്ഹി ഡെയര്ഡെവിള്സ്, സണ്റൈസേഴ്സ് ഹൈദരാബാദ് എന്നീ ടീമുകള്ക്കായി കളിച്ചു.
2025 മുതല് ഡല്ഹി ക്യാപിറ്റല്സിന്റെ മെന്ററായും പീറ്റേഴ്സന് പ്രവര്ത്തിക്കുന്നുണ്ട്. പഴയ കയ്പ്പേറിയ അനുഭവങ്ങള് മറന്ന് ഇപ്പോള് സമാധാനപരമായ ജീവിതമാണ് നയിക്കുന്നതെന്നും ക്രിക്കറ്റ് ഇതിഹാസം കൂട്ടിച്ചേര്ത്തു.
