ന്യൂഡല്ഹി: സാങ്കേതിക തകരാറിനെത്തുടര്ന്ന് രണ്ട് മാസത്തോളമായി നിര്ത്തിവെച്ചിരുന്ന തദ്ദേശീയ യുദ്ധവിമാനമായ എല്.സി.എ തേജസിന്റെ പറക്കല് ഇന്ന് പുനരാരംഭിക്കും. ഫെബ്രുവരി ആദ്യവാരം നടന്ന ഒരു ലാന്ഡിംഗ് അപകടത്തെത്തുടര്ന്നാണ് തേജസ് വിമാനങ്ങള് താല്ക്കാലികമായി നിലത്തിറക്കിയിരുന്നത്. വിമാനത്തില് കണ്ടെത്തിയ സോഫ്റ്റ്വെയര് സംബന്ധമായ തകരാര് പരിഹരിച്ചതായും 36 തേജസ് വിമാനങ്ങളും ഇന്ന് മുതല് വീണ്ടും പറക്കുമെന്നും ഹിന്ദുസ്ഥാന് എയറോനോട്ടിക്സ് ലിമിറ്റഡ് സി.എം.ഡി ഡി.കെ. സുനില് അറിയിച്ചു.
ലോക്കല് മോഡിഫിക്കേഷന് കമ്മിറ്റി വിഷയം വിശദമായി ചര്ച്ച ചെയ്തതായും ആവശ്യമായ മാറ്റങ്ങള് വരുത്തിയതായും അദ്ദേഹം വ്യക്തമാക്കി. ഫെബ്രുവരിയിലുണ്ടായ സംഭവം തകര്ച്ചയല്ലെന്നും വിമാനം നിലത്തായിരിക്കുമ്പോള് സംഭവിച്ച ചെറിയ സാങ്കേതിക തകരാര് മാത്രമാണെന്നുമാണ് എച്ച്.എ.എല് വിശദീകരിക്കുന്നത്. പടിഞ്ഞാറന് ഏഷ്യയിലെ സംഘര്ഷങ്ങളും ‘ഓപ്പറേഷന് സിന്ദൂറിന്’ ശേഷമുള്ള പാകിസ്ഥാന്റെ ഭീഷണികളും നിലനില്ക്കുന്ന സാഹചര്യത്തില് തേജസ് സ്ക്വാഡ്രണുകള് സജ്ജമായിരിക്കുന്നത് ഇന്ത്യയെ സംബന്ധിച്ചിടത്തോളം നിര്ണ്ണായകമാണ്.
പാകിസ്ഥാനുമായും ചൈനയുമായും ഒരേസമയം യുദ്ധം നേരിടാന് വ്യോമസേനയ്ക്ക് 42 സ്ക്വാഡ്രണുകള് ആവശ്യമാണെന്നിരിക്കെ, നിലവില് ഇത് 29 ആയി കുറഞ്ഞിരിക്കുകയാണ്. ഈ സാഹചര്യത്തില് തേജസിന്റെ തിരിച്ചുവരവ് വ്യോമസേനയ്ക്ക് വലിയ കരുത്താകും. 2016-ല് സേവനത്തിന്റെ ഭാഗമായ ശേഷം തേജസ് വിമാനം നേരിടുന്ന മൂന്നാമത്തെ വലിയ സാങ്കേതിക പ്രതിസന്ധിയാണിത്. 2024 മാര്ച്ചില് ജയ്സാല്മീറില് വെച്ച് നടന്ന ആദ്യ അപകടത്തില് വിമാനം തകര്ന്നുവെങ്കിലും പൈലറ്റ് അത്ഭുതകരമായി രക്ഷപ്പെട്ടു.
2025 നവംബറില് ദുബായ് എയര്ഷോയ്ക്കിടെ ഉണ്ടായ രണ്ടാമത്തെ അപകടത്തില് വിങ് കമാന്ഡര് നമന്ഷ് സിയാല് വീരമൃത്യു വരിച്ചിരുന്നു. 2026 ഫെബ്രുവരിയില് ലാന്ഡിംഗിനിടെ ഉണ്ടായ സാങ്കേതിക തകരാറിനെത്തുടര്ന്ന് രണ്ട് മാസത്തേക്ക് വിമാനങ്ങള് നിലത്തിറക്കിയിരിക്കുകയായിരുന്നു. ഇന്ന് മുതല് തേജസ് വിമാനങ്ങള് വീണ്ടും ആകാശത്ത് സജീവമാകുന്നതോടെ വ്യോമസേനയുടെ പ്രതിരോധ പ്രവര്ത്തനങ്ങള് കൂടുതല് ശക്തമാകും.
