കവി കുഞ്ഞുണ്ണി മാഷിന്റെ ഓർമ്മയ്‌ക്കായി ബാലസാഹിതീപ്രകാശൻ ഏർപ്പെടുത്തിയ 2026ലെ കുഞ്ഞുണ്ണി പുരസ്കാരത്തിന് എഴുത്തുകാരൻ കെ.ജി. രഘുനാഥ് അർഹനായി. ബാലസാഹിത്യമേഖലയിൽ കെ.ജി. രഘുനാഥിന്റെ സമഗ്ര സംഭാവനകൾ പരിഗണിച്ചാണ് അവാർഡ്.
പ്രശസ്ത സാഹിത്യകാരൻ ഡോ. ജോർജ്ജ് ഓണക്കൂർ അധ്യക്ഷനും ഡോ.ജെ.പ്രമീളാദേവി, ഡോ. ഗോപി പുതുക്കോട്, ശ്രീജിത്ത് മൂത്തേടത്ത് എന്നിവർ അംഗങ്ങളുമായ സമിതിയാണ് പുരസ്കാരം നിർണയിച്ചത്.
25,000 രൂപയും പ്രശസ്തിപത്രവും ശില്പവും അടങ്ങുന്നതാണ് പുരസ്കാരം. കുഞ്ഞുണ്ണി മാഷുടെ ജന്മദിനമായ മെയ് പത്തിന് പാലക്കാട് വച്ചുനടക്കുന്ന ചടങ്ങിൽ പുരസ്കാരം സമർപ്പിക്കും. കൊല്ലം കോട്ടുക്കൽ സ്വദേശിയായ കെ.ജി. രഘുനാഥ് കോഴിക്കോട് നിവാസിയാണ്. കഥ, നോവൽ, ബാലസാഹിത്യം, നാടകം, പഠനം എന്നീ മേഖലകളിലായി നിരവധി കൃതികൾ രചിച്ചിട്ടുണ്ട്.
