തിരുവനന്തപുരം: വിഷുക്കണി കാണുന്നതിനായി കത്തിച്ചുവെച്ച നിലവിളക്കിൽ നിന്ന് തീ പടർന്ന് വീടിന് തീപിടിച്ചു. തിരുവനന്തപുരം കുടപ്പനക്കുന്നിന് സമീപം തുമ്പിക്കോണം ലൈനിൽ ഗീതയുടെ വീട്ടിലാണ് അപകടമുണ്ടായത്. ബുധനാഴ്ച പുലർച്ചെയോടെയായിരുന്നു സംഭവം. അപകടത്തിൽ വീടിന്റെ ഹാൾ പൂർണ്ണമായും കത്തിനശിച്ചു.
പുലർച്ചെ എഴുന്നേറ്റ് വിഷുക്കണി കണ്ട ശേഷം വീട്ടുകാർ നിലവിളക്ക് അണയ്ക്കാതെ വീണ്ടും കിടന്നുറങ്ങുകയായിരുന്നു. ഈ സമയം നിലവിളക്കിൽ നിന്ന് തീ പടർന്നതാകാമെന്നാണ് പ്രാഥമിക നിഗമനം. തീ പടർന്നതിനെത്തുടർന്നുണ്ടായ പുക ശ്വസിച്ച് വീട്ടിലുണ്ടായിരുന്ന മൂന്നുപേർക്ക് ശാരീരിക അസ്വസ്ഥതകൾ അനുഭവപ്പെട്ടു. ഇവരെ ഉടൻതന്നെ നഗരത്തിലെ സ്വകാര്യ ആശുപത്രിയിൽ പ്രവേശിപ്പിച്ചു. ഇവരുടെ ആരോഗ്യനില നിലവിൽ ആശങ്കാജനകമല്ല.
വീടിനുള്ളിൽ നിന്ന് നിലവിളി കേട്ടെത്തിയ നാട്ടുകാരാണ് ആദ്യം രക്ഷാപ്രവർത്തനം നടത്തിയത്. ജനൽ ചില്ലുകൾ തകർത്ത് അകത്തേക്ക് വെള്ളമൊഴിച്ചാണ് തീ നിയന്ത്രണവിധേയമാക്കിയത്. തുടർന്ന് ഫയർഫോഴ്സ് സ്ഥലത്തെത്തി തീ പൂർണ്ണമായും അണച്ചു. തീപിടുത്തത്തിൽ വീടിനുള്ളിലെ ഫർണിച്ചറുകളും മറ്റ് ഇലക്ട്രോണിക് ഉപകരണങ്ങളും നശിച്ചിട്ടുണ്ട്.
