കണ്ണൂര്: അഞ്ചരക്കണ്ടി ഡെന്റല് കോളേജ് വിദ്യാര്ത്ഥിയുടെ വിയോഗം കേവലം ഒരു ആത്മഹത്യയല്ലെന്നും അതിനു പിന്നില് വ്യക്തമായ മാനസിക പീഡനങ്ങളുണ്ടെന്നുമാണ് പുറത്തുവരുന്ന വിവരങ്ങള് സൂചിപ്പിക്കുന്നത്. നിതിന്റെ മരണത്തിന് പിന്നാലെ ലോണ് ആപ്പിനെതിരെ പോലീസ് കേസെടുത്തു. ലോണ് എടുത്തതുമായി ബന്ധപ്പെട്ട് ‘ഇന്സ്റ്റാ പേ’ എന്ന ആപ്പിന്റെ പ്രതിനിധികള് നിതിന് രാജിനെ നിരന്തരം ഭീഷണിപ്പെടുത്തിയിരുന്നതായി പോലീസ് കണ്ടെത്തി. പണം തിരിച്ചടയ്ക്കാന് സമ്മര്ദ്ദം ചെലുത്തുകയും നിതിനെ മാനസികമായി തകര്ക്കുകയും ചെയ്തതിനാണ് പോലീസ് നിലവില് കേസെടുത്തിരിക്കുന്നത്. ലോണ് ആപ്പുകളുടെ ക്രൂരമായ പ്രവര്ത്തനരീതിയാണ് ഇവിടെയും വില്ലനായത്.
ലോണ് മാഫിയയുടെ സമ്മര്ദ്ദത്തിന് പുറമെ, കോളേജിലെ അധ്യാപകരില് നിന്നും സഹപാഠികളില് നിന്നും നിതിന് കടുത്ത അവഗണനയും മാനസിക പീഡനവും നേരിട്ടിരുന്നതായി അന്വേഷണത്തില് വ്യക്തമായിട്ടുണ്ട്. ഡോ. എം.കെ. റാം ഉള്പ്പെടെയുള്ള അധ്യാപകരുടെ പീഡനമാണ് നിതിനെ മരണത്തിലേക്ക് നയിച്ചതെന്ന് വിദ്യാര്ത്ഥികള് ആരോപിക്കുന്നു. കേസില് കുറ്റാരോപിതരായ അധ്യാപകര് നിലവില് ഒളിവിലാണ്. ഇവര്ക്കായി പോലീസ് തിരച്ചില് ഊര്ജിതമാക്കി. വിദ്യാര്ത്ഥികളുടെ കടുത്ത പ്രതിഷേധത്തെ തുടര്ന്ന് ഡോ. റാമിനെ പുറത്താക്കാന് കോളേജ് അധികൃതര് തീരുമാനിച്ചെങ്കിലും ഇതില് ഔദ്യോഗിക സ്ഥിരീകരണം ഇതുവരെ ഉണ്ടായിട്ടില്ല.
നിതിന് രാജിന് നീതി ലഭിക്കണമെന്നാവശ്യപ്പെട്ട് അഞ്ചരക്കണ്ടി ഡെന്റല് കോളേജില് വിദ്യാര്ത്ഥി സംഘടനകളുടെ നേതൃത്വത്തില് അനിശ്ചിതകാല സമരം തുടരുകയാണ്. ഉത്തരവാദികളായ എല്ലാ അധ്യാപകരെയും മാതൃകാപരമായി ശിക്ഷിക്കണമെന്നാണ് ഇവരുടെ ആവശ്യം. അതേസമയം, സംഭവത്തിന്റെ ഗൗരവം കണക്കിലെടുത്ത് ആരോഗ്യ സര്വകലാശാല നിയോഗിച്ച പ്രത്യേക അന്വേഷണ സമിതി ഇന്ന് കോളേജിലെത്തും. അധ്യാപകരുടെയും വിദ്യാര്ത്ഥികളുടെയും മൊഴികള് സമിതി നേരിട്ട് രേഖപ്പെടുത്തും. സമിതിയുടെ റിപ്പോര്ട്ടിന്റെ അടിസ്ഥാനത്തില് കൂടുതല് കര്ശന നടപടികള് ഉണ്ടാകുമെന്നാണ് സൂചന.
