ന്യൂഡല്ഹി/ചണ്ഡീഗഡ്: പഞ്ചാബിലെ കര്ഷകര് നേരിടുന്ന പ്രതിസന്ധി പരിഹരിക്കാന് സജീവ ഇടപെടലുമായി കേന്ദ്ര സര്ക്കാര്. കര്ഷകരുടെ ഉല്പ്പന്നങ്ങള് ഗുണനിലവാരത്തിന്റെ പേരില് തഴയപ്പെടാതിരിക്കാന് ഗോതമ്പ് സംഭരണത്തിനുള്ള മാനദണ്ഡങ്ങളില് കേന്ദ്ര സര്ക്കാര് വലിയ ഇളവുകള് പ്രഖ്യാപിച്ചു. കര്ഷക ക്ഷേമത്തിന് മുന്ഗണന നല്കുന്ന മോദി സര്ക്കാരിന്റെ ഈ തീരുമാനം സംസ്ഥാനത്തെ കര്ഷകര്ക്ക് വലിയ ആശ്വാസമാകും.
കേന്ദ്ര ഭക്ഷ്യ-പൊതുവിതരണ മന്ത്രി പ്രഹ്ലാദ് ജോഷി അറിയിച്ച പുതിയ തീരുമാനപ്രകാരം, ഗോതമ്പ് മണികളുടെ തിളക്കം 70 ശതമാനം വരെ നഷ്ടപ്പെട്ടാലും അവ സംഭരിക്കാന് കേന്ദ്രം അനുമതി നല്കി. കാലാവസ്ഥാ വ്യതിയാനം മൂലം വിളനാശം സംഭവിച്ച കര്ഷകര്ക്ക് തുണയാകുന്നതാണ് ഈ നടപടി. ചുളിഞ്ഞതും പൊട്ടിയതുമായ ഗോതമ്പ് മണികളുടെ സംഭരണ പരിധി നിലവിലുണ്ടായിരുന്ന 6 ശതമാനത്തില് നിന്നും 15 ശതമാനമായി കേന്ദ്രം വര്ദ്ധിപ്പിച്ചു. നേരിയ തോതില് കേടുപാടുകള് സംഭവിച്ച ഗോതമ്പിന്റെ അളവ് ആകെ സംഭരണത്തിന്റെ 15 ശതമാനം വരെയാകാമെന്ന് കേന്ദ്രം വ്യക്തമാക്കി.
അകാല മഴയും കടുത്ത ചൂടും കാരണം വിള മോശമായ സാഹചര്യത്തില്, സംസ്ഥാന സര്ക്കാര് ആവശ്യപ്പെട്ട ഉടന് തന്നെ കേന്ദ്ര സംഘം സ്ഥലത്തെത്തി സാമ്പിളുകള് ശേഖരിക്കുകയും അതിവേഗം റിപ്പോര്ട്ട് നല്കി ഇളവുകള് അനുവദിക്കുകയുമായിരുന്നു. കേന്ദ്ര സര്ക്കാര് എപ്പോഴും പഞ്ചാബിലെ കര്ഷകരുടെ പങ്കിനെ അംഗീകരിക്കുകയും അവര്ക്കൊപ്പം നിലകൊള്ളുകയും ചെയ്തിട്ടുണ്ടെന്ന് കേന്ദ്ര റെയില്വേ സഹമന്ത്രി രവ്നീത് സിംഗ് ബിട്ടു പറഞ്ഞു. ‘സംസ്ഥാന സര്ക്കാര് ഈ വിഷയത്തില് അനാവശ്യമായി രാഷ്ട്രീയം കളിക്കുകയായിരുന്നു. എന്നാല് കര്ഷകരുടെ ബുദ്ധിമുട്ട് മനസ്സിലാക്കിയ കേന്ദ്രം, ആവശ്യപ്പെട്ട ഉടന് തന്നെ വിദഗ്ധ സംഘത്തെ അയച്ച് പരിഹാരം കാണുകയാണ് ചെയ്തത്,’ അദ്ദേഹം കൂട്ടിച്ചേര്ത്തു.
ഇളവുകള് അനുസരിച്ച് സംഭരിക്കുന്ന ഗോതമ്പ് പ്രത്യേകമായി സൂക്ഷിക്കാനും മുന്ഗണനാടിസ്ഥാനത്തില് വിതരണം ചെയ്യാനും കേന്ദ്രം നിര്ദ്ദേശിച്ചിട്ടുണ്ട്. കര്ഷകര്ക്ക് നല്കുന്ന ഈ ആനുകൂല്യം വഴി ഉണ്ടാകുന്ന അധിക സാമ്പത്തിക ബാധ്യത സംസ്ഥാന സര്ക്കാര് വഹിക്കേണ്ടതുണ്ട്. കേന്ദ്രത്തിന്റെ ഈ സമയോചിതമായ ഇടപെടല് പഞ്ചാബിലെ കര്ഷകര്ക്കിടയിലുണ്ടായിരുന്ന ആശങ്കകള്ക്ക് അറുതി വരുത്തിയിരിക്കുകയാണ്.
