തിരുവനന്തപുരം: സംസ്ഥാനത്ത് വൈദ്യുതി ആവശ്യകത ഓരോ ദിവസവും ശരാശരി 50 മെഗാവാട്ട് വീതം വര്ധിക്കുന്ന പ്രതിസന്ധിയിലേക്ക് കേരളം നീങ്ങുന്നു. പുറത്തുനിന്നുള്ള വൈദ്യുതി വിഹിതത്തില് 200 മെഗാവാട്ടിന്റെ കുറവുണ്ടായതും പ്രതിസന്ധിയുടെ ആഴം കൂട്ടുന്നു. ഉപഭോഗം ഇതേപടി തുടര്ന്നാല് മുന്കൂട്ടി നിശ്ചയിച്ച സമയങ്ങളില് വൈദ്യുതി വിതരണം തടസ്സപ്പെടുത്തേണ്ടി വരുമെന്നാണ് റിപ്പോര്ട്ട്.
രാത്രികാലങ്ങളില് വൈദ്യുതി തടസ്സം ഒഴിവാക്കാന് ഉപഭോക്താക്കള് ശ്രദ്ധിക്കണം. വൈകുന്നേരം 6 മണി മുതല് രാത്രി 10 മണി വരെ കടുത്ത നിയന്ത്രണം പാലിക്കുക. ഈ സമയങ്ങളില് ഇന്ഡക്ഷന് അടുപ്പുകള്, വാഷിങ് മെഷീന്, വാട്ടര് പമ്പുകള്, മിക്സി, അയണ് ബോക്സ് തുടങ്ങിയവയുടെ ഉപയോഗം പൂര്ണ്ണമായും ഒഴിവാക്കുക. ആളില്ലാത്ത മുറികളിലെ ഫാന്, ലൈറ്റ്, എസി എന്നിവ ഓഫ് ചെയ്യുന്നത് ശീലമാക്കുക.
നിലവിലെ സാങ്കേതിക ബുദ്ധിമുട്ടുകള് മറികടക്കാന് ദീര്ഘകാല കരാറുകള് വഴി കൂടുതല് വൈദ്യുതി എത്തിക്കാനാണ് ബോര്ഡ് ലക്ഷ്യമിടുന്നത്. ഇതിനായി ഇലക്ട്രിസിറ്റി റെഗുലേറ്ററി കമ്മീഷന്റെ അനുമതി തേടിയിട്ടുണ്ട്. വൈദ്യുതി ബോര്ഡിന്റെ ഈ അപേക്ഷയില് ഏപ്രില് 22-ന് കമ്മീഷന് തെളിവെടുപ്പ് നടത്തും.
‘ഉപഭോഗം കുറയ്ക്കാന് തയ്യാറായില്ലെങ്കില് ഇരുട്ടിലും ചൂടിലും കഴിയേണ്ടി വരുന്ന സാഹചര്യം ഒഴിവാക്കാനാവില്ല. പൊതുജനങ്ങളുടെ സഹകരണം അനിവാര്യമാണ്.’ – കെ.എസ്.ഇ.ബി വക്താവ്. ഇപ്പോള്ത്തന്നെ പലയിടങ്ങളിലും അനുഭവപ്പെടുന്ന ചെറിയ സമയത്തെ പവര്കട്ടുകള്, പരിഹാരം കണ്ടില്ലെങ്കില് ദീര്ഘനേരത്തേക്ക് നീളാന് സാധ്യതയുണ്ട്.
