തിരുവനന്തപുരം: കേരളത്തില് ഉഷ്ണതരംഗത്തിന് സമാനമായ സാഹചര്യം തുടരുന്നു. പാലക്കാട് ജില്ലയില് താപനില 40 ഡിഗ്രി സെല്ഷ്യസ് കടന്ന സാഹചര്യത്തില് സ്കൂളുകളുടെയും മറ്റ് വിദ്യാഭ്യാസ സ്ഥാപനങ്ങളുടെയും പ്രവര്ത്തനത്തിന് ജില്ലാ കളക്ടര് താല്ക്കാലിക വിലക്ക് ഏര്പ്പെടുത്തി. ജില്ലയില് നിര്ജ്ജലീകരണം മൂലം രണ്ട് മരണം റിപ്പോര്ട്ട് ചെയ്തത് സ്ഥിതിയുടെ ഗൗരവം വര്ധിപ്പിക്കുന്നു. ഇടുക്കി, വയനാട് ഒഴികെയുള്ള 12 ജില്ലകളില് തീവ്രമായ ചൂട് തുടരുന്നതിനാല് കേന്ദ്ര കാലാവസ്ഥാ വകുപ്പ് യെല്ലോ അലര്ട്ട് പ്രഖ്യാപിച്ചു.
പാലക്കാട് 40 ഡിഗ്രിക്ക് പുറമെ, കൊല്ലം (39), കോട്ടയം (38) എന്നിവിടങ്ങളിലും താപനില ഉയര്ന്നുതന്നെ നില്ക്കും. മറ്റ് തീരദേശ ജില്ലകളില് ശരാശരി 37ഡിഗ്രി വരെ ചൂട് അനുഭവപ്പെടാന് സാധ്യതയുണ്ട്. അന്തരീക്ഷത്തിലെ ഈര്പ്പത്തിന്റെ അളവ് കൂടുന്നതിനാല് മലയോര മേഖലകള് ഒഴികെയുള്ള ഇടങ്ങളില് കടുത്ത അസ്വസ്ഥതയും വിയര്പ്പും അനുഭവപ്പെടും. അതേസമയം, ചൂടിന് നേരിയ ശമനമേകി ഏപ്രില് 22 വരെ സംസ്ഥാനത്തിന്റെ വിവിധ ഭാഗങ്ങളില് ഇടിമിന്നലോട് കൂടിയ ഒറ്റപ്പെട്ട മഴയ്ക്ക് സാധ്യതയുണ്ടെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.
കഴിഞ്ഞ ദിവസങ്ങളില് പെയ്ത മഴയോടൊപ്പം ഉണ്ടായ ശക്തമായ കാറ്റില് പലയിടങ്ങളിലും കൃഷിനാശവും മരങ്ങള് വീണുള്ള നാശനഷ്ടങ്ങളും റിപ്പോര്ട്ട് ചെയ്തിട്ടുണ്ട്. ജനങ്ങള് പകല് 11 മണി മുതല് 3 മണി വരെ നേരിട്ട് വെയില് ഏല്ക്കുന്നത് ഒഴിവാക്കണമെന്നും ധാരാളം വെള്ളം കുടിക്കണമെന്നും ആരോഗ്യവകുപ്പ് നിര്ദ്ദേശിച്ചു.
