കൊച്ചി: പഹൽഗാം ഭീകരാക്രമണത്തിൽ വീരമൃത്യു വരിച്ച രാമചന്ദ്രന്റെ മകളുടെ വീഡിയോയ്ക്ക് താഴെ വിവാദ കമന്റിട്ട യുവാവ് അറസ്റ്റിൽ. എറണാകുളം നോർത്ത് പറവൂർ സ്വദേശിയായ മുഹമ്മദ് സനൂപിനെയാണ് പൊലീസ് അറസ്റ്റ് ചെയ്തത്. സൗദി അറേബ്യയിൽ നിന്ന് നാട്ടിലെത്തിയ ഇയാളെ കരിപ്പൂർ അന്താരാഷ്ട്ര വിമാനത്താവളത്തിൽ വെച്ചാണ് എയർപോർട്ട് പൊലീസ് കസ്റ്റഡിയിലെടുത്തത്.
“ഇന്ത്യക്കാർ ഇനിയും മരിക്കും” എന്ന തരത്തിൽ പാകിസ്ഥാൻ അനുകൂലവും രാജ്യ വിരുദ്ധവുമായ കമന്റാണ് ഇയാൾ ഇട്ടത്. യുവമോർച്ച നേതാവ് അധീന ഭാരതി നൽകിയ പരാതിയുടെ അടിസ്ഥാനത്തിലാണ് പൊലീസ് നടപടി. ഡിജിറ്റൽ തെളിവുകൾ അടക്കം ശേഖരിച്ച ശേഷമാണ് പ്രതിയെ അറസ്റ്റ് ചെയ്തത്. ഇയാൾക്കെതിരെ ഇന്ത്യൻ ന്യായ സംഹിതയിലെയും വിവരസാങ്കേതിക നിയമത്തിലെയും പ്രസക്തമായ വകുപ്പുകൾ ചുമത്തിയാണ് നടപടി സ്വീകരിച്ചതെന്ന് പൊലീസ് അറിയിച്ചു.
പഹൽഗാം ഭീകരാക്രമണത്തിൽ കൊല്ലപ്പെട്ട എൻ. രാമചന്ദ്രന്റെ മകൾ ആരതിയുടെ അഭിമുഖ വീഡിയോയ്ക്ക് താഴെ ഇന്ത്യ വിരുദ്ധവും പാകിസ്ഥാനെ പിന്തുണയ്ക്കുന്നതുമായ കമന്റുകളാണ് മുഹമ്മദ് സനൂപ് പോസ്റ്റ് ചെയ്തത്. ഇന്ത്യൻ സൈന്യത്തെ അപകീർത്തിപ്പെടുത്തുന്ന തരത്തിലുള്ള പരാമർശങ്ങളും പഹൽഗാം ആക്രമണം നടത്തിയ ഭീകരരെ പ്രകീർത്തിക്കുന്ന തരത്തിലുള്ള കമന്റുകളും ഇയാൾ ഇട്ടിരുന്നു. മുഹമ്മദ് സനൂപിന്റെ അറസ്റ്റ് സംബന്ധിച്ച വിവരം പരാതിക്കാരനായ അധീന ഭാരതിയും സമൂഹമാധ്യമത്തിലൂടെ പങ്കുവച്ചിട്ടുണ്ട്.
പ്രതിയെ കോടതിയിൽ ഹാജരാക്കി തുടർനടപടികൾ സ്വീകരിക്കുമെന്ന് പൊലീസ് അറിയിച്ചു. കേസുമായി ബന്ധപ്പെട്ട ഡിജിറ്റൽ തെളിവുകളും ഇയാളുടെ സാമൂഹ്യമാധ്യമ ഇടപെടലുകളും അന്വേഷണസംഘം വിശദമായി പരിശോധിച്ചുവരികയാണ്.
