ന്യൂഡല്‍ഹി: ഡല്‍ഹിയിലും പരിസരപ്രദേശങ്ങളിലും ടാര്‍ഗറ്റഡ് കില്ലിംഗിനും ഗ്രനേഡ് ആക്രമണങ്ങള്‍ക്കും പദ്ധതിയിട്ട രണ്ട് ഭീകരരെ ഡല്‍ഹി പോലീസ് സ്‌പെഷ്യല്‍ സെല്‍ പിടികൂടി. പാകിസ്താന്‍ ആസ്ഥാനമായി പ്രവര്‍ത്തിക്കുന്ന ഐഎസ്‌ഐ ഏജന്റ് ഷെഹ്സാദ് ഭട്ടിയുടെ കൂട്ടാളികളാണ് പിടിയിലായത്. മധ്യപ്രദേശിലെ ഗ്വാളിയോര്‍ സ്വദേശികളായ രാജ്വീര്‍ (21), വിവേക് ബഞ്ചാര (19) എന്നിവരാണ് അറസ്റ്റിലായത്. ഇവരുടെ ശൃംഖലയെക്കുറിച്ചും മറ്റ് ബന്ധങ്ങളെക്കുറിച്ചും പോലീസ് അന്വേഷണം ഊര്‍ജ്ജിതമാക്കി.
ഡല്‍ഹി-എന്‍സിആര്‍ മേഖലയില്‍ ആക്രമണങ്ങള്‍ നടത്താന്‍ ഭട്ടി പദ്ധതിയിടുന്നതായി കഴിഞ്ഞ മാസം സ്‌പെഷ്യല്‍ സെല്ലിന് രഹസ്യവിവരം ലഭിച്ചിരുന്നു. ഇതിന്റെ അടിസ്ഥാനത്തില്‍ നടത്തിയ നീക്കത്തിനൊടുവില്‍ ഏപ്രില്‍ 16-ന് ഗ്വാളിയോറില്‍ നിന്ന് വിവേക് ബഞ്ചാരയെ പോലീസ് പിടികൂടി. ഇയാളെ അഞ്ച് ദിവസത്തെ കസ്റ്റഡിയില്‍ വാങ്ങി ചോദ്യം ചെയ്തപ്പോഴാണ് രാജ്വീറിനെക്കുറിച്ചുള്ള വിവരം ലഭിച്ചത്.
തുടര്‍ന്ന് ഏപ്രില്‍ 18-ന് ഡല്‍ഹിയിലെ സരായ് കാലെ ഖാനില്‍ നിന്ന് രാജ്വീറിനെയും അറസ്റ്റ് ചെയ്തു. ഇവരില്‍ നിന്ന് ഒരു പിസ്റ്റള്‍, ആറ് ലൈവ് കാട്രിഡ്ജുകള്‍, ഭീകരവാദ ബന്ധമുള്ള വീഡിയോകളും വോയ്സ് മെസേജുകളുമുള്ള രണ്ട് മൊബൈല്‍ ഫോണുകള്‍ എന്നിവ പിടിച്ചെടുത്തു. ഭട്ടിയുടെ കൂട്ടാളിയായ ‘റാണ ഭായ്’ എന്ന വ്യക്തി സോഷ്യല്‍ മീഡിയ വഴിയാണ് രാജ്വീറിനെ ഭീകരവാദത്തിലേക്ക് ആകര്‍ഷിച്ചതെന്ന് അന്വേഷണത്തില്‍ വ്യക്തമായി. രാജ്വീറാണ് പിന്നീട് വിവേക് ബഞ്ചാരയെ ഈ സംഘത്തിന് പരിചയപ്പെടുത്തിയത്.
ഭട്ടിയുടെ നിര്‍ദ്ദേശപ്രകാരം ആയുധങ്ങള്‍ ശേഖരിക്കാന്‍ ഇവര്‍ ആദ്യം അഹമ്മദാബാദിലേക്ക് പോയെങ്കിലും അത് നടന്നില്ല. പിന്നീട് ഏപ്രില്‍ 9-ന് അമൃത്സറില്‍ എത്തി അവിടെനിന്ന് ഒരു പിസ്റ്റളും പണവും കൈപ്പറ്റി. സിരാക്പൂരിലെ ഒരു ക്ലബ്ബിന് നേരെ ആക്രമണം നടത്താനായിരുന്നു പദ്ധതി. എന്നാല്‍ തോക്ക് പ്രവര്‍ത്തിക്കാത്തതിനാല്‍ ഏപ്രില്‍ 11-ന് നടത്തിയ ആക്രമണശ്രമം പരാജയപ്പെട്ടു. തുടര്‍ന്ന് ഡല്‍ഹിയിലെ ഒരു പ്രമുഖ ഹോട്ടല്‍ ലക്ഷ്യമിട്ട് നീങ്ങുന്നതിനിടെയാണ് ഇവര്‍ പിടിയിലായത്.
കഴിഞ്ഞ ആഴ്ചയില്‍ ഐഎസ്‌ഐയുടെ പിന്തുണയോടെ പ്രവര്‍ത്തിക്കുന്ന മറ്റൊരു ചാര-ഭീകര ശൃംഖലയെയും സ്‌പെഷ്യല്‍ സെല്‍ തകര്‍ത്തിരുന്നു. പാകിസ്താന്‍ ആസ്ഥാനമായുള്ള ഖാലിസ്ഥാനി ഭീകര സംഘടനയായ ബാബര്‍ ഖല്‍സ ഇന്റര്‍നാഷണലുമായി ബന്ധമുള്ള 11 പേരെയാണ് അന്ന് അറസ്റ്റ് ചെയ്തത്. സൗരോര്‍ജ്ജത്തില്‍ പ്രവര്‍ത്തിക്കുന്ന സിസിടിവി ക്യാമറകള്‍ ഉപയോഗിച്ചുള്ള രഹസ്യ നിരീക്ഷണ ശൃംഖലയും അന്ന് പോലീസ് കണ്ടെത്തിയിരുന്നു. സുരക്ഷാ സ്ഥാപനങ്ങള്‍ക്ക് നേരെ നടക്കാന്‍ സാധ്യതയുണ്ടായിരുന്ന ഗ്രനേഡ് ആക്രമണങ്ങളാണ് ഈ അറസ്റ്റുകളിലൂടെ ഒഴിവാക്കപ്പെട്ടത്.
