ന്യൂഡല്ഹി: യുദ്ധഭൂമിയില് ടാങ്കുകളുടെയും കവചിത വാഹനങ്ങളുടെയും മുന്നേറ്റത്തിന് തടസ്സമാകുന്ന കുഴിബോംബുകളെ നിഷ്പ്രഭമാക്കാന് അത്യാധുനിക ‘ട്രോള്’ സംവിധാനവുമായി ഇന്ത്യന് പ്രതിരോധ മന്ത്രാലയം. സൈന്യത്തിന്റെ പ്രധാന യുദ്ധ ടാങ്കുകളായ ടി-72, ടി-90 എന്നിവയില് ഘടിപ്പിക്കാവുന്ന ഈ സംവിധാനത്തിനായി 975 കോടി രൂപയുടെ കരാറില് മന്ത്രാലയം ഒപ്പുവെച്ചു. പ്രതിരോധ സെക്രട്ടറി രാജേഷ് കുമാര് സിംഗിന്റെ സാന്നിധ്യത്തിലായിരുന്നു കരാര് ഒപ്പിട്ടത്.
ടാങ്കുകളുടെ മുന്ഭാഗത്ത് ഘടിപ്പിക്കുന്ന ഒരു പ്രത്യേക ഉപകരണമാണ് ട്രോള് അസംബ്ലി. യുദ്ധസമയത്ത് ശത്രുക്കള് മണ്ണില് ഒളിപ്പിച്ചുവെച്ചിരിക്കുന്ന കുഴിബോംബുകള് തിരിച്ചറിയാനും അവ സുരക്ഷിതമായി നീക്കം ചെയ്യാനുമാണ് ഇത് ഉപയോഗിക്കുന്നത്. ടാങ്ക് മുന്നോട്ട് നീങ്ങുമ്പോള് അതിനു മുന്നിലുള്ള മണ്ണിലെ കുഴിബോംബുകളെ ഈ സംവിധാനം പുറത്തെടുക്കുകയോ സുരക്ഷിതമായി പൊട്ടിച്ചുകളയുകയോ ചെയ്യുന്നു. ഇത് ടാങ്കുകള്ക്ക് തടസ്സമില്ലാതെ സഞ്ചരിക്കാന് സുരക്ഷിതമായ ഒരു പാത ഒരുക്കുന്നു.
കാന്തിക തരംഗങ്ങള് ഉപയോഗിച്ച് പ്രവര്ത്തിക്കുന്ന അത്യാധുനിക ‘പ്രോക്സിമിറ്റി മാഗ്നറ്റിക് ഫ്യൂസ്’ കുഴിബോംബുകളെപ്പോലും കണ്ടെത്തി നശിപ്പിക്കാന് ഇതിന് ശേഷിയുണ്ട്. പ്രതിരോധ ഗവേഷണ വികസന കേന്ദ്രമായ ഡി.ആര്.ഡി.ഒ രൂപകല്പ്പന ചെയ്ത ഈ സംവിധാനം പൂര്ണ്ണമായും തദ്ദേശീയമായാണ് നിര്മ്മിക്കുന്നത്. കേന്ദ്ര പൊതുമേഖലാ സ്ഥാപനമായ ഭാരത് എര്ത്ത് മൂവേഴ്സ് ലിമിറ്റഡും, സ്വകാര്യ കമ്പനിയായ ഇലക്ട്രോ ന്യൂമാറ്റിക്സ് ആന്റ് ഹൈഡ്രോളിക്സും ചേര്ന്നാണ് ഇതിന്റെ നിര്മ്മാണം പൂര്ത്തിയാക്കുക.
കുഴിബോംബുകള് നീക്കം ചെയ്യാന് സൈനികര് നേരിട്ട് ഇറങ്ങേണ്ടതില്ല എന്നതിനാല് അപകടസാധ്യത കുറയുന്നു. ടാങ്കിന്റെ വേഗത കുറയ്ക്കാതെ തന്നെ പ്രദേശം സുരക്ഷിതമാക്കാം. സൈനിക വാഹനങ്ങളുടെ നീക്കം വേഗത്തിലാക്കുന്നത് വഴി യുദ്ധമുഖത്ത് പെട്ടെന്നുള്ള നീക്കങ്ങള് നടത്താന് ഇന്ത്യയ്ക്ക് സാധിക്കും. വിദേശ രാജ്യങ്ങളില് നിന്നുള്ള ഇറക്കുമതി കുറച്ച് പ്രതിരോധ മേഖലയില് ഇന്ത്യ സ്വയംപര്യാപ്തത കൈവരിക്കുന്നതിന്റെ ഭാഗമായാണ് ഈ കരാര്. കവചിത വിഭാഗത്തിന്റെ പ്രഹരശേഷി വര്ദ്ധിപ്പിക്കുന്നതില് ഈ പുതിയ സാങ്കേതികവിദ്യ നിര്ണ്ണായക പങ്ക് വഹിക്കുമെന്നാണ് പ്രതിരോധ വൃത്തങ്ങളുടെ വിലയിരുത്തല്.
