തിരുവനന്തപുരം: സംസ്ഥാനത്ത് മോട്ടോർ വാഹന വകുപ്പ് നടപ്പിലാക്കിയ ട്രാഫിക് ചലാനുകളുടെ തീർപ്പാക്കൽ പദ്ധതി (Amnesty scheme) ഏപ്രിൽ 30-ന് അവസാനിക്കുന്നു. 2024 ഡിസംബർ 31 വരെ രേഖപ്പെടുത്തിയ ട്രാഫിക് ഇ-ചലാനുകൾക്ക് 50 ശതമാനം ഇളവോടെ പിഴ അടച്ചു തീർക്കാനുള്ള അവസാന അവസരമാണിത്.
പല വാഹന ഉടമകൾക്കും തങ്ങളുടെ വാഹനത്തിന് ചലാൻ ഉണ്ടെന്ന വിവരം അറിയാൻ കഴിയാത്ത സാഹചര്യമുണ്ട്. പ്രത്യേകിച്ചും പരിവാഹൻ പോർട്ടലിൽ മൊബൈൽ നമ്പർ അപ്ഡേറ്റ് ചെയ്യാത്തവർക്ക് ചലാൻ സംബന്ധിച്ച എസ്.എം.എസ് ലഭിക്കാറില്ല. ഇത്തരം ബുദ്ധിമുട്ടുകൾ ഒഴിവാക്കാൻ മോട്ടോർ വാഹന വകുപ്പ് സൗകര്യമൊരുക്കിയിട്ടുണ്ട്.
വാഹനത്തിന് നിലവിൽ ചലാനുകൾ പെൻഡിങ് ഉണ്ടോ എന്ന് പരിശോധിക്കാൻ മോട്ടോർ വാഹന വകുപ്പ് നൽകിയിട്ടുള്ള ഔദ്യോഗിക QR കോഡ് സ്കാൻ ചെയ്യുക. ശേഷം വാഹന നമ്പർ നൽകുന്നതിലൂടെ നിലവിലുള്ള ചലാനുകളുടെ പട്ടിക അറിയാൻ സാധിക്കും.
http://https://services.mvd.kerala.gov.inഎന്ന വെബ്സൈറ്റിലെ ‘Amnesty Scheme’ ലിങ്ക് വഴി ഓൺലൈനായി പിഴ അടയ്‌ക്കാം. കോടതിയിലേക്ക് കൈമാറപ്പെട്ട ചലാനുകളുടെ കാര്യത്തിൽ അതത് മോട്ടോർ വാഹന വകുപ്പ് ഓഫീസുകളുമായി ബന്ധപ്പെട്ട് ആവശ്യമായ നടപടികൾ സ്വീകരിക്കേണ്ടതാണ്.
ഏപ്രിൽ 30-ന് ശേഷം പിഴ അടയ്‌ക്കുന്നവർക്ക് ഈ ആനുകൂല്യം ലഭിക്കില്ലെന്ന് അധികൃതർ അറിയിച്ചു. അതിനാൽ കാലാവധി അവസാനിക്കുന്നതിന് മുൻപ് തന്നെ വാഹന ഉടമകൾ ഈ ആനുകൂല്യം പ്രയോജനപ്പെടുത്തുക.
