ഹൈദരാബാദ്: അത്താഴത്തിന് ചിക്കന്‍കറി വെക്കാത്തത് ചോദ്യം ചെയ്ത ഭര്‍ത്താവിനെ ഭാര്യ വെട്ടിക്കൊന്നു . കാമറെഡ്ഡിയില്‍ ഗോസാങ്കി കോളനിയിലെ കോദണ്ഡം ശിവജിയാണ് കൊല്ലപ്പെട്ടത്. സംഭവത്തില്‍ ഭാര്യ ലക്ഷ്മിയെ പോലീസ് കസ്റ്റഡിയിലെടുത്തു.
ശിവാജി രാത്രി 9 മണിയോടെ ഭാര്യ ലക്ഷ്മിയുമായി കോഴിക്കറി ഉണ്ടാക്കാത്തതിനെ തുടർന്ന് രൂക്ഷമായ തർക്കത്തിൽ ഏർപ്പെട്ടു. സമീപത്ത് താമസിക്കുന്ന ബന്ധുക്കൾ ഇടപെട്ട് ദമ്പതികളെ ശാന്തരാക്കി.
എന്നാല്‍ ചിക്കന്‍ കറി തയ്യാറാക്കാത്തതിനൊപ്പം മറ്റ് പല കാര്യങ്ങളും ചൂണ്ടിക്കാട്ടി ശിവാജി ഭാര്യ ലക്ഷ്മിയെ രൂക്ഷമായി കുറ്റപ്പെടുത്തുകയായിരുന്നെന്ന് അയല്‍വാസികള്‍ പറഞ്ഞു.
ഇതോടെ കയ്യില്‍ കിട്ടിയ അരിവാളെടുത്ത് ലക്ഷ്മി ശിവജിയെ വെട്ടിപ്പരിക്കേല്‍പ്പിക്കുകയായിരുന്നു. കഴുത്തിന് ഗുരുതരമായി മുറിവേറ്റ ശിവജി ഉടന്‍ തറയില്‍ വീണു. വീഴ്ചയില്‍ തലയ്‌ക്ക് ഗുരുതരമായി പരുക്കേല്‍ക്കുകയും ചെയ്തപ്പോൾ ശിവജി തല്‍ക്ഷണം മരിക്കുകയും ചെയ്തു.
മുറിവില്‍ നിന്ന് ധാരാളം രക്തം വാര്‍ന്നുപോയതാണ് മരണകാരണമെന്ന് കാമറെഡ്ഡി ഇന്‍സ്‌പെക്ടര്‍ ബി. നാരഹരി പറഞ്ഞു. ആറ് വര്‍ഷങ്ങള്‍ക്ക് മുന്‍പ് വിവാഹിതരായ ദമ്പതികള്‍ക്ക് രണ്ട് പെണ്‍മക്കളുണ്ട്. കുടുംബകാര്യങ്ങളെച്ചൊല്ലി ദമ്പതികൾ പലപ്പോഴും തർക്കത്തിലേർപ്പെട്ടിരുന്നുവെന്നും, തർക്കങ്ങൾ പരിഹരിക്കാൻ മുതിർന്നവർ പലതവണ ഇടപെട്ടിട്ടുണ്ടെന്നും കുടുംബാംഗങ്ങൾ പറയുന്നു.
ശിവാജിയുടെ മൂത്ത സഹോദരൻ സൂരി നൽകിയ പരാതിയുടെ പോലീസ് കേസെടുത്തിട്ടുണ്ട്. ബിഎൻഎസ് സെക്ഷൻ 103 (1) (കൊലപാതകം) പ്രകാരം ലക്ഷ്മിക്കെതിരെ പോലീസ് കേസ് രജിസ്റ്റർ ചെയ്തു.
