ന്യൂഡല്ഹി: ഐ.സി.എസ്.ഇ (പത്താം ക്ലാസ്), ഐ.എസ്.സി (പന്ത്രണ്ടാം ക്ലാസ്) പരീക്ഷാ ഫലങ്ങള് കൗണ്സില് ഫോര് ദി ഇന്ത്യന് സ്കൂള് സര്ട്ടിഫിക്കറ്റ് എക്സാമിനേഷന്സ് പ്രസിദ്ധീകരിച്ചു. ഇരു പരീക്ഷകളിലും 99 ശതമാനത്തിലധികം വിജയം രേഖപ്പെടുത്തിയപ്പോള് ഇത്തവണയും പെണ്കുട്ടികളാണ് മികച്ച പ്രകടനം കാഴ്ചവെച്ചത്. പത്താം ക്ലാസില് 99.47 ശതമാനം പെണ്കുട്ടികള് വിജയിച്ചപ്പോള് ആണ്കുട്ടികളുടെ വിജയശതമാനം 98.94 ആണ്. പന്ത്രണ്ടാം ക്ലാസിലും പെണ്കുട്ടികള് (99.53%) ആണ്കുട്ടികളെ (98.71%) പിന്നിലാക്കി.
രാജ്യത്തെ വിവിധ മേഖലകളില് സതേണ് റീജിയനാണ് ഏറ്റവും മികച്ച വിജയശതമാനം കരസ്ഥമാക്കിയത്. സതേണ് റീജിയന്: 99.87%, വെസ്റ്റേണ് റീജിയന്: 99.55%. ഈ വര്ഷം രാജ്യത്തുടനീളം നാല് ലക്ഷത്തോളം വിദ്യാര്ത്ഥികളാണ് സി.ഐ.എസ്.സി.ഇ ബോര്ഡ് പരീക്ഷകള് എഴുതിയത്. ഡിജിലോക്കര് വഴിയോ ബോര്ഡിന്റെ ഔദ്യോഗിക വെബ്സൈറ്റ് വഴിയോ വിദ്യാര്ത്ഥികള്ക്ക് ഫലം പരിശോധിക്കാവുന്നതാണ്.
ഫലത്തില് സംതൃപ്തരല്ലാത്ത വിദ്യാര്ത്ഥികള്ക്കായി പുനപ്പരിശോധനയ്ക്കും ഇംപ്രൂവ്മെന്റ് പരീക്ഷകള്ക്കും ബോര്ഡ് അവസരം നല്കുന്നുണ്ട്. മെയ് 1 മുതല് മെയ് 4 വരെയാണ് റീ-ചെക്കിംഗിനായി അപേക്ഷിക്കേണ്ടത്. ഇംപ്രൂവ്മെന്റ് പരീക്ഷ: മുമ്പുണ്ടായിരുന്ന കമ്പാര്ട്ട്മെന്റ് പരീക്ഷകള് ബോര്ഡ് നിര്ത്തലാക്കി. പകരം വിദ്യാര്ത്ഥികള്ക്ക് മാര്ക്ക് വര്ദ്ധിപ്പിക്കുന്നതിനായി പരമാവധി രണ്ട് വിഷയങ്ങളില് ഇതേ വര്ഷം തന്നെ ഇംപ്രൂവ്മെന്റ് പരീക്ഷ എഴുതാന് സാധിക്കും.
പത്താം ക്ലാസില് ഓരോ വിഷയത്തിനും 33 ശതമാനവും പന്ത്രണ്ടാം ക്ലാസില് 35 ശതമാനവുമാണ് വിജയിക്കാന് ആവശ്യമായ കുറഞ്ഞ മാര്ക്ക്. കഴിഞ്ഞ ഫെബ്രുവരി, മാര്ച്ച് മാസങ്ങളിലായാണ് ഐ.സി.എസ്.ഇ, ഐ.എസ്.സി പരീക്ഷകള് നടന്നത്. ഉന്നതവിജയം നേടിയ വിദ്യാര്ത്ഥികളെ ബോര്ഡ് അധികൃതര് അഭിനന്ദിച്ചു. വരും ദിവസങ്ങളില് ഇംപ്രൂവ്മെന്റ് പരീക്ഷകളുടെ തീയതികള് പ്രഖ്യാപിക്കും.
