ന്യൂഡല്ഹി: ഡല്ഹിയിലെ സ്വകാര്യ അണ്എയ്ഡഡ് വിദ്യാലയങ്ങളില് ഇനി മുതല് മാസം തോറും ഫീസ് അടയ്ക്കാന് രക്ഷിതാക്കള്ക്ക് അവകാശം. ഒരു മാസത്തെ ഫീസില് കൂടുതല് തുക ഒന്നിച്ചടയ്ക്കാന് രക്ഷിതാക്കളെ നിര്ബന്ധിക്കരുതെന്ന് ഡയറക്ടറേറ്റ് ഓഫ് എജ്യുക്കേഷന് വെള്ളിയാഴ്ച പുറത്തിറക്കിയ കര്ശന ഉത്തരവില് വ്യക്തമാക്കി. രണ്ടു മാസമോ മൂന്നു മാസമോ കൂടിയ ഫീസ് തുക മുന്കൂറായി അടയ്ക്കാന് സ്കൂള് അധികൃതര് നിര്ബന്ധിക്കുന്നുവെന്ന് രക്ഷിതാക്കളില് നിന്നും ആവര്ത്തിച്ച് പരാതികള് ഉയര്ന്ന പശ്ചാത്തലത്തിലാണ് ഈ നടപടി.
ഫീസ് ഒന്നിച്ചടയ്ക്കാനുള്ള സ്കൂളുകളുടെ സമ്മര്ദ്ദം സാധാരണക്കാരായ രക്ഷിതാക്കള്ക്ക് വലിയ സാമ്പത്തിക ബാധ്യതയുണ്ടാക്കുന്നുവെന്ന് ഉത്തരവില് പറയുന്നു. ‘താഴ്ന്ന, ഇടത്തരം വരുമാന വിഭാഗങ്ങളില്പ്പെട്ടവര്ക്ക് ഇത് അമിത ഭാരമാണ്. എല്ലാവര്ക്കും തുല്യമായി വിദ്യാഭ്യാസം ലഭ്യമാക്കുക എന്ന ലക്ഷ്യത്തിന് വിരുദ്ധമാണ് ഇത്തരം നടപടികള്,’ ഡിഒഇ നിരീക്ഷിച്ചു. ഹൈക്കോടതി നിര്ദ്ദേശങ്ങള്ക്കും വിദ്യാഭ്യാസ നിയമങ്ങള്ക്കും വിരുദ്ധമായി പ്രവര്ത്തിക്കുന്ന സ്കൂളുകള്ക്കെതിരെ 1973-ലെ ഡല്ഹി സ്കൂള് വിദ്യാഭ്യാസ നിയമപ്രകാരം കര്ശന നടപടി സ്വീകരിക്കുമെന്നും അധികൃതര് മുന്നറിയിപ്പ് നല്കി.
എന്നാല്, രക്ഷിതാക്കള്ക്ക് സ്വന്തം താല്പര്യപ്രകാരം ഒന്നിലധികം മാസത്തെ ഫീസ് ഒന്നിച്ചടയ്ക്കാനുള്ള ഓപ്ഷന് വിദ്യാലയങ്ങള്ക്ക് നല്കാവുന്നതാണ്. സര്ക്കാര് തീരുമാനത്തെ വലിയ ആശ്വാസത്തോടെയാണ് രക്ഷിതാക്കള് സ്വാഗതം ചെയ്യുന്നത്. പല പ്രമുഖ സ്കൂളുകളിലും 15,000 രൂപയ്ക്ക് മുകളിലാണ് മാസഫീസ്. ഇത് മൂന്ന് മാസത്തേക്ക് ഒന്നിച്ചടയ്ക്കുമ്പോള് ഏകദേശം 50,000 രൂപയോളം വരും. ഈ ഭാരം ഒഴിവാകുന്നത് ആശ്വാസകരമാണെന്ന് രക്ഷിതാക്കള് പ്രതികരിച്ചു. അതേസമയം, ഉത്തരവ് കേവലം രേഖകളില് ഒതുങ്ങാതെ കര്ശനമായി നടപ്പിലാക്കുന്നുണ്ടെന്ന് സര്ക്കാര് ഉറപ്പുവരുത്തണമെന്ന് ആവശ്യവും ഉയരുന്നുണ്ട്.
