ഇറ്റാനഗര്: അരുണാചല് പ്രദേശിലെ തന്ത്രപ്രധാനമായ മെഞ്ചൂക്ക അതിര്ത്തിയില് ഇന്ത്യന് സൈന്യത്തിന്റെ കരുത്ത് തെളിയിച്ച ‘ഓപ്പറേഷന് സിന്ദൂര്’ ലക്ഷ്യം കണ്ടിട്ട് ഒരാണ്ട് തികയുന്നു. മെയ് 7-ന് നടക്കുന്ന ഒന്നാം വാര്ഷികത്തോടനുബന്ധിച്ച് ഗവണ്മെന്റ് ഹയര് സെക്കന്ഡറി സ്കൂളില് ഇന്ത്യന് സൈന്യം വിപുലമായ ആഘോഷ പരിപാടികള് സംഘടിപ്പിച്ചു. രാജ്യസുരക്ഷയില് സൈന്യം പുലര്ത്തുന്ന ജാഗ്രതയെക്കുറിച്ചും പ്രവര്ത്തന മികവിനെക്കുറിച്ചും പൊതുജനങ്ങള്ക്ക് അവബോധം നല്കുകയായിരുന്നു ചടങ്ങിന്റെ പ്രധാനലക്ഷ്യം.
ദുഷ്കരമായ മലനിരകളില് സൈന്യം നടത്തിയ കൃത്യമായ ആസൂത്രണവും അതിന്റെ നിര്വ്വഹണവുമാണ് ഓപ്പറേഷന് സിന്ദൂറിനെ ശ്രദ്ധേയമാക്കുന്നത്. വാര്ഷികാഘോഷത്തിന്റെ ഭാഗമായി നടന്ന സെമിനാറില് ഓപ്പറേഷന്റെ പ്രധാന ഘട്ടങ്ങളെക്കുറിച്ചും കൈവരിച്ച നേട്ടങ്ങളെക്കുറിച്ചും സൈനിക ഉദ്യോഗസ്ഥര് വിശദീകരിച്ചു. വിദ്യാര്ത്ഥികളും അധ്യാപകരും ഉള്പ്പെടെയുള്ള പ്രാദേശിക സമൂഹം ആവേശത്തോടെയാണ് ചടങ്ങില് പങ്കെടുത്തത്.
സൈന്യത്തിന്റെ സാങ്കേതിക മികവ് വെളിപ്പെടുത്തുന്ന ആയുധങ്ങളുടെയും ഉപകരണങ്ങളുടെയും പ്രത്യേക പ്രദര്ശനം മെഞ്ചൂക്കയില് ഒരുക്കിയിരുന്നു. അതിര്ത്തിയിലെ കഠിനമായ ഭൂപ്രകൃതിയിലും പ്രതികൂല കാലാവസ്ഥയിലും ശത്രുക്കളെ നേരിടാന് സൈനികര് ഉപയോഗിക്കുന്ന അത്യാധുനിക ആയുധങ്ങള് നേരിട്ട് കാണാന് ഇത് അവസരം നല്കി. സൈന്യത്തിന്റെ ആയുധശേഖരത്തെക്കുറിച്ചും സജ്ജീകരണങ്ങളെക്കുറിച്ചും കുട്ടികള് ഉള്പ്പെടെയുള്ളവര് ചോദിച്ചറിഞ്ഞു.
തൊഴിലാളി ദിനവും ഓപ്പറേഷന് സിന്ദൂര് വാര്ഷികവും ചേര്ന്നു വരുന്ന സാഹചര്യത്തില്, അതിര്ത്തിയിലെ സൈനിക നീക്കങ്ങളില് തോളോട് തോള് ചേര്ന്ന് പ്രവര്ത്തിക്കുന്ന പോര്ട്ടര്മാരെയും (ചുമട്ടുതൊഴിലാളികള്) സൈന്യം ആദരിച്ചു. ആയുധങ്ങളും അവശ്യസാധനങ്ങളും ദുര്ഘടപാതകളിലൂടെ എത്തിക്കുന്നതില് പോര്ട്ടര്മാര് നല്കുന്ന സേവനം വലുതാണെന്ന് സ്പിയര്ഹെഡ് ഡിവിഷന് വ്യക്തമാക്കി.
സൈന്യവും പ്രാദേശിക സമൂഹവും തമ്മിലുള്ള ദൃഢമായ ബന്ധത്തിന്റെ അടയാളമായി ഈ ആഘോഷങ്ങള് മാറി. രാജ്യത്തിന്റെ പരമാധികാരം സംരക്ഷിക്കാന് സൈന്യത്തിനൊപ്പം ഗ്രാമീണരും കൈകോര്ക്കുമെന്ന ഉറച്ച തീരുമാനത്തോടെയാണ് വാര്ഷികാഘോഷങ്ങള് സമാപിച്ചത്. രാജ്യത്തിന്റെ അതിര്ത്തികള് സുരക്ഷിതമാണെന്ന സന്ദേശം ഈ വാര്ഷികാഘോഷം വീണ്ടും അടിവരയിട്ടു.
