തിരുവനന്തപുരം: നിയമസഭാ തെരഞ്ഞെടുപ്പ് ഫലസൂചനകളിൽ യു ഡി എഫിന് മുന്നേറ്റം ദൃശ്യമായി തുടങ്ങിയപ്പോൾ കോൺഗ്രസ് ക്യാമ്പുകളിൽ ഗ്രൂപ്പ് പോര് വെളിവാകുന്നു. പറവൂരിൽ വി ഡി സതീശൻ പിന്നിലാണെന്നുള്ള വാർത്തയും ഹരിപ്പാട്ട് രമേശ് ചെന്നിത്തലയ്‌ക്ക് നേരിയ ഭൂരിപക്ഷം മാത്രമാണുള്ളതെന്ന വാർത്തയും പുറത്തു വരുമ്പോഴായിരുന്നു ഇന്ദിരാഭവനു മുന്നിൽ കോൺഗ്രസ് അനുയായികളുടെ ആഹ്ലാദപ്രകടനം.
ദേശീയ ജനറൽസെക്രട്ടറി കെ സി വേണുഗോപാലിന്റെ കൂറ്റൻ കട്ടൗട്ടും ചുമന്നു കൊണ്ടായിരുന്നു പ്രകടനം. ഇടയ്‌ക്കൊക്കെ കെസി വേണുഗോപലിനനുകൂലമായ മുദ്രാവാക്യം വിളികളുമുയരുന്നുണ്ടായിരുന്നു. എന്നാലീ പ്രകടനത്തിൽ രമേശ് ചെന്നിതലയുടെയോ വി ഡി സതീശന്റെയോ പേരോ ചിത്രങ്ങളോ ഉണ്ടായിരുന്നില്ല.
യു ഡി എഫ് ജയിച്ചാൽ കോൺഗ്രസിൽ നിന്നും ആരായിരിക്കും മുഖ്യമന്ത്രി ആകുക എന്നുള്ള ചർച്ചകൾ അന്തരീക്ഷത്തിൽ കൊടുമ്പിരിക്കൊണ്ടിരിക്കെയാണ് ഇന്ദിരാ ഭവന് മുന്നിൽ കെസി വേണുഗോപാലിന് അഭിവാദ്യം അർപ്പിച്ചുകൊണ്ടുള്ള പ്രകടനം നടന്നത്.
