തമിഴകത്ത് ‘വിജയ്’ തരംഗം; വിജയാഘോഷങ്ങള്‍ക്കിടെ സര്‍പ്രൈസായി തൃഷ പനയൂരിലെത്തി

ചെന്നൈ: തമിഴ്നാട് നിയമസഭാ തിരഞ്ഞെടുപ്പില്‍ നടന്‍ വിജയ്‌യുടെ രാഷ്‌ട്രീയ പാര്‍ട്ടിയായ തമിഴക വെട്രി കഴകം (ടിവികെ) അവിശ്വസനീയമായ മുന്നേറ്റം നടത്തുമ്പോള്‍, ചെന്നൈയിലെ പനയൂരിലുള്ള വിജയ്‌യുടെ വസതിയില്‍ ഇരട്ടി മധുരമായി നടി തൃഷയുടെ സന്ദര്‍ശനം. തന്റെ ജന്മദിനത്തില്‍ സുഹൃത്തിന്റെ രാഷ്‌ട്രീയ വിജയത്തില്‍ പങ്കുചേരാനാണ് തൃഷ എത്തിയത്. ആദ്യ ഫലസൂചനകള്‍ പുറത്തുവരുമ്പോള്‍ തമിഴ്നാട്ടിലെ ദ്രാവിഡ രാഷ്‌ട്രീയത്തെ ഞെട്ടിച്ചുകൊണ്ടാണ് വിജയ്‌യുടെ പാര്‍ട്ടി മുന്നേറുന്നത്. നൂറിലധികം സീറ്റുകളില്‍ ലീഡ് നിലനിര്‍ത്തുന്ന ടിവികെ, പ്രധാന പാര്‍ട്ടികളായ ഡിഎംകെയ്‌ക്കും എഐഎഡിഎംകെയ്‌ക്കും വലിയ വെല്ലുവിളിയാണ് ഉയര്‍ത്തുന്നത്.

വിജയം ഉറപ്പിച്ചതോടെ പനയൂരിലെ വിജയ്‌യുടെ വസതിക്ക് മുന്നില്‍ ‘വിസില്‍ പോട്’ ഗാനത്തിനൊപ്പം ആയിരക്കണക്കിന് ആരാധകരാണ് ആഘോഷങ്ങളില്‍ അണിനിരക്കുന്നത്. ഇന്ന് തന്റെ 43-ാം ജന്മദിനം ആഘോഷിക്കുന്ന തൃഷ, പുലര്‍ച്ചെ തിരുപ്പതി ക്ഷേത്രത്തില്‍ ദര്‍ശനം നടത്തിയിരുന്നു. ഇതിന് പിന്നാലെയാണ് വിജയ്‌യെ നേരില്‍ കണ്ട് അഭിനന്ദിക്കാന്‍ അവര്‍ എത്തിയത്. തിരഞ്ഞെടുപ്പ് പ്രചാരണ വേളയില്‍ വിജയ്‌യുടെ രാഷ്‌ട്രീയ പ്രവേശനവുമായി ബന്ധപ്പെട്ട് തൃഷയ്‌ക്കെതിരെ വലിയ രീതിയിലുള്ള സൈബര്‍ ആക്രമണങ്ങള്‍ നടന്നിരുന്നു.

#WATCH | Tamil Nadu: Actor Trisha Krishnan leaves from the residence of TVK chief and actor Vijay, in Chennai.

TVK is currently leading in 110 seats of the total 234 in the state. pic.twitter.com/332dL4OiIp

— ANI (@ANI) May 4, 2026

വിജയ്‌യുടെ സ്വകാര്യ ജീവിതവുമായി ബന്ധപ്പെടുത്തിയും വ്യാജ പ്രചാരണങ്ങള്‍ ഉയര്‍ന്നു. എന്നാല്‍ രാഷ്‌ട്രീയ വിവാദങ്ങളില്‍ ഭാഗമാകാതിരുന്ന തൃഷ, വോട്ടെണ്ണല്‍ ദിനത്തില്‍ നേരിട്ടെത്തി തന്റെ പിന്തുണ പരസ്യമായി പ്രകടിപ്പിച്ചിരിക്കുകയാണ്. നിലവിലെ ട്രെന്‍ഡുകള്‍ തുടരുകയാണെങ്കില്‍ തമിഴ് രാഷ്‌ട്രീയത്തിലെ കിരീടം വയ്‌ക്കാത്ത രാജാവായി വിജയ് മാറുമെന്നാണ് രാഷ്‌ട്രീയ നിരീക്ഷകര്‍ വിലയിരുത്തുന്നത്. സംസ്ഥാനത്തെ പ്രധാന കോട്ടകളിലെല്ലാം വിള്ളല്‍ വീഴ്‌ത്തിയുള്ള ഈ മുന്നേറ്റം തമിഴക രാഷ്‌ട്രീയത്തിന്റെ ഗതി മാറ്റുമെന്ന് ഉറപ്പാണ്.