കണ്ണൂർ: വേങ്ങാട് പഞ്ചായത്തിൽ ഉൾപ്പെട്ട കീഴത്തൂരിലെ രാജീവ്ഭവൻ ഓഫിസിന് നേരെ അക്രമം. ഇന്ന് പുലർച്ചെയാണ് അക്രമം നടന്നത്. തെരഞ്ഞെടുപ്പ് പരാജയത്തിന് പിന്നാലെ നടന്ന അക്രമത്തിൽ സി.പി.എമ്മിനെതിരെ രൂക്ഷവിമർശനവുമായി കോൺഗ്രസ് നേതൃത്വം.
തെരഞ്ഞെടുപ്പിലേറ്റ കനത്ത പരാജയത്തിന്റെ ജാള്യത മറയ്‌ക്കാനാണ് സി.പി.എം അക്രമം അഴിച്ചുവിടുന്നതെന്ന് കോൺഗ്രസ് ആരോപിച്ചു. സി.പി.എം പ്രവർത്തകർ ബോധപൂർവം സംഘർഷം സൃഷ്ടിക്കുകയാണെന്നും, ജനാധിപത്യപരമായ തോൽവി അംഗീകരിക്കാൻ കഴിയാത്തതാണ് ഇത്തരം അക്രമങ്ങൾക്ക് പിന്നിലെന്നും നേതാക്കൾ പറയുന്നു.
ഓഫീസിന്റെ ജനൽ ചില്ലുകളും കൊടിമരവും അക്രമികൾ തകർത്തിട്ടുണ്ട്. അക്രമികൾക്കെതിരെ കർശന നടപടി സ്വീകരിക്കണമെന്നും പ്രദേശത്തെ സമാധാന അന്തരീക്ഷം തകർക്കാനുള്ള നീക്കത്തിൽ നിന്ന് സി.പി.എം പിന്തിരിയണമെന്നും കോൺഗ്രസ് ആവശ്യപ്പെട്ടു.
