തിരുവനന്തപുരം: പാർട്ടി നേതൃത്വത്തിനെതിരെ ഒളിയമ്പുമായി പി ജയരാജൻ. കമ്മ്യൂണിസ്റ്റുകൾ പാർലമെന്ററി വ്യവസ്ഥയിൽ എത്തുമ്പോൾ പലതരം ജീർണ്ണതകൾ കടന്നുവരും. അത് ചർച്ച ചെയ്തു തിരുത്തണം. ഇല്ലെങ്കിൽ ജനങ്ങൾക്ക് ഇടയിൽ പാർട്ടിയോടുള്ള വിശ്വാസ്യതയ്ക്ക് മങ്ങലേൽക്കും. ഈ പ്രശ്നങ്ങൾ പരിശോധിക്കാതെ മുന്നോട്ടു പോകാൻ ആകില്ല.
തെറ്റ് തിരുത്തൽ പ്രക്രിയ പാർട്ടി സംഘടനയ്ക്ക് അകത്ത് നടത്തണമെന്നും ജയരാജൻ പറഞ്ഞു. തെരഞ്ഞെടുപ്പു ഫലം അണികളിലുണ്ടാക്കിയ നിരാശയെ കുറിച്ചും സോഷ്യൽ മീഡിയ പ്രതികരണങ്ങളെ കുറിച്ചും ജയരാൻ പറയുന്നുണ്ട്.
അതേസമയം, സിപിഎം പ്രതിപക്ഷത്തിരിക്കുമ്പോൾ അരങ്ങേറുന്ന പതിവ് പരിപാടികളായ സമരവും പ്രതിഷേധ പരിപാടികളുമായി മുന്നോട്ട് പോകണമെന്ന ആഹ്വാനവും ജയരാജൻ നടത്തുന്നുണ്ട്. കേരളത്തിന്റെ വലതുപക്ഷവത്കരണത്തിനെതിരായ തീഷ്ണമായ സമരങ്ങൾ ഇടതുപക്ഷം ഏറ്റെടുക്കേണ്ടതുണ്ടെന്നാണ് ജയരാജന്റെ ഭാഷ്യം.
