ഗിരിദി: ജാര്‍ഖണ്ഡിലെ ഗിരിദി ജില്ലയില്‍ ജനത്തിരക്കേറിയ മാര്‍ക്കറ്റിലേക്ക് അമിതവേഗതയിലെത്തിയ ട്രക്ക് പാഞ്ഞുകയറി നാല് പേര്‍ കൊല്ലപ്പെട്ടു. കഴിഞ്ഞ ദിവസം ഉണ്ടായ അപകടത്തില്‍ ഇരുപതിലധികം പേര്‍ക്ക് പരിക്കേറ്റു. അപകടത്തെത്തുടര്‍ന്ന് പ്രദേശത്ത് വലിയ പരിഭ്രാന്തിയും സംഘര്‍ഷാവസ്ഥയും നിലനില്‍ക്കുകയാണ്. നാല് മരണം സ്ഥിരീകരിച്ചതായി ഗിരിദി ഡെപ്യൂട്ടി കമ്മീഷണര്‍ രാംനിവാസ് യാദവ് അറിയിച്ചു.
ഗിരിദിയിലെ ഇസാരി ബസാറിലാണ് നാടിനെ നടുക്കിയ അപകടമുണ്ടായത്. നിയന്ത്രണം നഷ്ടപ്പെട്ട ട്രക്ക് റോഡരികില്‍ പാര്‍ക്ക് ചെയ്തിരുന്ന വാഹനങ്ങളിലേക്കും ചന്തയിലൂടെ നടന്നുപോവുകയായിരുന്ന പൗരന്മാരിലേക്കും ഇടിച്ചുകയറുകയായിരുന്നു. പരിക്കേറ്റവരില്‍ പലരുടെയും നില അതീവ ഗുരുതരമായി തുടരുന്നതിനാല്‍ മരണസംഖ്യ ഇനിയും ഉയരാന്‍ സാധ്യതയുണ്ടെന്നാണ് ഔദ്യോഗിക വൃത്തങ്ങള്‍ നല്‍കുന്ന സൂചന.
ചന്തയില്‍ വലിയ തിരക്കുള്ള സമയത്താണ് ട്രക്ക് അമിതവേഗതയില്‍ പാഞ്ഞുവന്നതെന്ന് ദൃക്‌സാക്ഷികള്‍ പറഞ്ഞു. മുന്നിലുള്ളതെല്ലാം തകര്‍ത്തു മുന്നേറിയ ട്രക്ക് ഒടുവില്‍ സ്വയം നില്‍ക്കുകയായിരുന്നു. ‘നിയന്ത്രണമില്ലാതെ വന്ന ട്രക്ക് അതിന്റെ പാതയിലുണ്ടായിരുന്ന എല്ലാത്തിനെയും ഇടിച്ചുതെറിപ്പിച്ചു കൊണ്ടിരുന്നു,’ ഒരു പ്രദേശവാസി പറഞ്ഞു. അപകടത്തിന് പിന്നാലെ തകര്‍ന്ന വാഹനങ്ങള്‍ക്കിടയില്‍ നിന്നും അവശിഷ്ടങ്ങള്‍ക്കിടയില്‍ നിന്നും പരിക്കേറ്റവരെ പുറത്തെടുക്കാന്‍ നാട്ടുകാര്‍ ഓടിക്കൂടി.
മിനിറ്റുകള്‍ക്കുള്ളില്‍ ദുമ്രി പോലീസ് സ്റ്റേഷനില്‍ നിന്നുള്ള സംഘമെത്തി രക്ഷാപ്രവര്‍ത്തനം ഏകോപിപ്പിച്ചു. പരിക്കേറ്റവരെ ഉടന്‍ തന്നെ സമീപത്തെ ആശുപത്രികളിലേക്ക് മാറ്റി. അപകടമുണ്ടാക്കിയ ട്രക്ക് പോലീസ് കസ്റ്റഡിയിലെടുത്തിട്ടുണ്ട്. സംഭവത്തെക്കുറിച്ച് വിശദമായ അന്വേഷണം ആരംഭിച്ചു. മരിച്ചവരുടെ വിവരങ്ങള്‍ അധികൃതര്‍ ഇതുവരെ പുറത്തുവിട്ടിട്ടില്ല. ദാരുണമായ ഈ അപകടത്തിന് പിന്നാലെ പ്രദേശവാസികള്‍ക്കിടയില്‍ കടുത്ത പ്രതിഷേധവും രോഷവും നിലനില്‍ക്കുന്നുണ്ട്. കുറ്റക്കാര്‍ക്കെതിരെ കര്‍ശന നടപടി വേണമെന്ന് നാട്ടുകാര്‍ ആവശ്യപ്പെട്ടു.
