തിരുവനന്തപുരം: പുതിയ അധ്യയന വര്ഷം പടിവാതില്ക്കല് എത്തിനില്ക്കെ, സംസ്ഥാനത്തെ സ്കൂള് വിദ്യാഭ്യാസ രംഗം കടുത്ത പ്രതിസന്ധിയിലാണെന്ന് ബിജെപി സംസ്ഥാന ജനറല് സെക്രട്ടറി അനൂപ് ആന്റണി. പാഠപുസ്തക വിതരണത്തിലെ കാലതാമസവും അധ്യാപക പരിശീലനത്തിലെ പാളിച്ചകളും ചൂണ്ടിക്കാട്ടി സര്ക്കാരിന്റെ വിദ്യാഭ്യാസ നയങ്ങള് പരാജയമാണെന്ന് അദ്ദേഹം കുറ്റപ്പെടുത്തി. സ്കൂള് തുറക്കാന് ഇനി മൂന്നാഴ്ച മാത്രമാണ് ബാക്കിയുള്ളത്. എന്നാല് പകുതിയോളം കുട്ടികള്ക്ക് പോലും ഇതുവരെ പാഠപുസ്തകങ്ങള് ലഭിച്ചിട്ടില്ല. ഇത് മുന് വിദ്യാഭ്യാസ വകുപ്പിന്റെ ഗുരുതരമായ വീഴ്ചയാണെന്ന് അദ്ദേഹം പറഞ്ഞു.
പുതിയ പാഠ്യപദ്ധതി നടപ്പിലാക്കാന് ഒരുങ്ങുമ്പോഴും അധ്യാപകര്ക്ക് ആവശ്യമായ പരിശീലനം നല്കുന്നതില് സര്ക്കാര് പരാജയപ്പെട്ടു. കൃത്യമായ മാര്ഗനിര്ദ്ദേശങ്ങളുടെ അഭാവം അധ്യാപകരിലും രക്ഷിതാക്കളിലും ഒരുപോലെ ആശങ്കയുണ്ടാക്കുന്നു. എസ്.സി.ഇ.ആര്.ടി തലത്തിലുള്ള ഏകോപനക്കുറവും ഉത്തരവുകള് പുറപ്പെടുവിക്കുന്നതിലെ കാലതാമസവുമാണ് നിലവിലെ പ്രതിസന്ധിക്ക് ആക്കം കൂട്ടുന്നത്. ഡിജിറ്റല് വിദ്യാഭ്യാസത്തിനായി കോടികള് ചെലവാക്കിയെന്ന് അവകാശപ്പെടുമ്പോഴും പല സ്കൂളുകളിലും ഇന്നും മതിയായ അടിസ്ഥാന സൗകര്യങ്ങളില്ലെന്ന് അനൂപ് ആന്റണി ആരോപിച്ചു.
കേരളത്തിന്റെ വിദ്യാഭ്യാസ മാതൃകയെക്കുറിച്ച് വാതോരാതെ സംസാരിക്കുന്ന സര്ക്കാര് പ്രായോഗിക തലത്തില് വിദ്യാര്ത്ഥികളെയും അധ്യാപകരെയും വഞ്ചിക്കുകയാണെന്ന് ബിജെപി വിമര്ശിച്ചു. പാഠപുസ്തക വിതരണവും അധ്യാപക പരിശീലനവും യുദ്ധകാലാടിസ്ഥാനത്തില് പൂര്ത്തിയാക്കിയില്ലെങ്കില് ശക്തമായ പ്രതിഷേധ പരിപാടികളുമായി മുന്നോട്ട് പോകുമെന്നും അദ്ദേഹം മുന്നറിയിപ്പ് നല്കി. സംസ്ഥാനത്തെ ലക്ഷക്കണക്കിന് വിദ്യാര്ത്ഥികളുടെ ഭാവി വെച്ച് സര്ക്കാര് പന്താടരുതെന്നും അനൂപ് ആന്റണി ആവശ്യപ്പെട്ടു.
