ന്യൂഡല്‍ഹി: അന്താരാഷ്‌ട്ര നര്‍ക്കോ-ഭീകരവാദ ശൃംഖലയിലെ പ്രധാന കണ്ണിയും പിടികിട്ടാപ്പുള്ളിയുമായ ഇക്ബാല്‍ സിംഗ് എന്ന ഷെറയെ എന്‍ഐഎ സംഘം ഡല്‍ഹി വിമാനത്താവളത്തില്‍ വെച്ച് കസ്റ്റഡിയിലെടുത്തു. വര്‍ഷങ്ങള്‍ നീണ്ട നിയമപോരാട്ടത്തിനൊടുവില്‍ പോര്‍ച്ചുഗലില്‍ നിന്ന് നാടുകടത്തിയാണ് ഇയാളെ ഇന്ത്യയിലെത്തിച്ചത്. ഹിസ്ബുള്‍ മുജാഹിദ്ദീന്‍ ഭീകരര്‍ക്ക് സാമ്പത്തിക സഹായം എത്തിക്കുന്നതില്‍ ഇയാള്‍ നിര്‍ണ്ണായക പങ്ക് വഹിച്ചിരുന്നു. അമൃത്സര്‍ സ്വദേശിയായ ഷെറ, പാകിസ്ഥാന്‍ കേന്ദ്രീകരിച്ചുള്ള മയക്കുമരുന്ന് മാഫിയയുടെ ഇന്ത്യയിലെ പ്രധാന ഏജന്റായിരുന്നു.
പാകിസ്ഥാനില്‍ നിന്ന് പഞ്ചാബ് അതിര്‍ത്തി വഴി ഹെറോയിന്‍ ഉള്‍പ്പെടെയുള്ള ലഹരിമരുന്നുകള്‍ ഇന്ത്യയിലേക്ക് കടത്തുകയായിരുന്നു ഇയാളുടെ രീതി. ലഹരിമരുന്ന് വില്‍പനയിലൂടെ ലഭിക്കുന്ന കോടിക്കണക്കിന് രൂപ ഹവാല വഴി കാശ്മീരിലെ ഹിസ്ബുള്‍ ഭീകരര്‍ക്കും അവരുടെ പാക് ഹാന്‍ഡ്ലര്‍മാര്‍ക്കും ഇയാള്‍ കൈമാറി. ലഹരിക്കടത്തിനായി പഞ്ചാബ് കേന്ദ്രീകരിച്ച് വിപുലമായ ഒരു ക്രിമിനല്‍ സംഘത്തെ തന്നെ ഷെറ നിയന്ത്രിച്ചിരുന്നു.
2020-ല്‍ ഹിസ്ബുള്‍ കമാന്‍ഡര്‍ റിയാസ് നായ്‌ക്കുവിന്റെ സഹായി ഹിലാല്‍ അഹമ്മദ് ഷെര്‍ഗോജ്രി പിടിയിലായതോടെയാണ് ഈ ശൃംഖലയെക്കുറിച്ചുള്ള വിവരങ്ങള്‍ പുറത്തുവന്നത്. ഹിലാലില്‍ നിന്ന് 29 ലക്ഷം രൂപയും തുടര്‍ന്ന് നടത്തിയ പരിശോധനയില്‍ വിവിധയിടങ്ങളില്‍ നിന്ന് 32 ലക്ഷം രൂപയും കണ്ടെടുത്തു. ഈ പണമിടപാടുകളുടെ സൂത്രധാരന്‍ ഷെറയാണെന്ന് എന്‍ഐഎ കണ്ടെത്തിയതോടെയാണ് ഇയാള്‍ വിദേശത്തേക്ക് കടന്നത്.
ഇന്റര്‍പോള്‍ റെഡ് കോര്‍ണര്‍ നോട്ടീസ് പുറപ്പെടുവിച്ച ഷെറയെ വിട്ടുനല്‍കാന്‍ പോര്‍ച്ചുഗീസ് സര്‍ക്കാരിന് മേല്‍ ഇന്ത്യ ശക്തമായ സമ്മര്‍ദ്ദം ചെലുത്തിയിരുന്നു. രാജ്യസുരക്ഷയ്‌ക്ക് ഭീഷണിയായ നര്‍ക്കോ-ഭീകരവാദത്തിനെതിരെയുള്ള പോരാട്ടത്തില്‍ എന്‍ഐഎ നേടിയ വലിയ വിജയമായാണ് ഈ അറസ്റ്റ് വിലയിരുത്തപ്പെടുന്നത്.
കനത്ത സുരക്ഷയില്‍ എന്‍ഐഎ ആസ്ഥാനത്തെത്തിച്ച ഷെറയെ വിശദമായി ചോദ്യം ചെയ്യും. ഇതോടെ പാകിസ്ഥാന്‍ കേന്ദ്രീകരിച്ചുള്ള കൂടുതല്‍ ഭീകര ബന്ധങ്ങളും ലഹരിക്കടത്ത് ശൃംഖലകളും വെളിച്ചത്തുവരുമെന്നാണ് അന്വേഷണ സംഘം കരുതുന്നത്. കുറ്റവാളികള്‍ ലോകത്തിന്റെ ഏത് കോണില്‍ ഒളിച്ചാലും നിയമത്തിന് മുന്നില്‍ കൊണ്ടുവരുമെന്ന ഉറച്ച സന്ദേശമാണ് ഈ നടപടി നല്‍കുന്നത്.
