ന്യൂഡല്‍ഹി: ഇന്ത്യന്‍ ജൂനിയര്‍ പുരുഷ ഹോക്കി ടീമിന്റെ പരിശീലക സ്ഥാനത്തുനിന്ന് തന്നെ നീക്കം ചെയ്ത ഹോക്കി ഇന്ത്യയുടെ നടപടിക്കെതിരെ തുറന്നടിച്ച് മുന്‍ ഒളിമ്പ്യനും ഇതിഹാസ ഗോള്‍കീപ്പറുമായ പി.ആര്‍. ശ്രീജേഷ്. തന്റെ കീഴില്‍ ടീം പങ്കെടുത്ത അഞ്ച് ടൂര്‍ണമെന്റുകളിലും മെഡലുകള്‍ നേടിയിട്ടും, വിദേശ പരിശീലകന് വേണ്ടി വഴിമാറിക്കൊടുക്കാന്‍ ആവശ്യപ്പെട്ടത് തന്നെ അത്ഭുതപ്പെടുത്തിയെന്ന് അദ്ദേഹം പറഞ്ഞു.
സാധാരണയായി മോശം പ്രകടനത്തിന്റെ പേരിലാണ് പരിശീലകര്‍ക്ക് സ്ഥാനം നഷ്ടപ്പെടാറുള്ളതെങ്കില്‍, തന്റെ കാര്യത്തില്‍ നേട്ടങ്ങള്‍ വിനയാവുകയായിരുന്നുവെന്ന് ശ്രീജേഷ് സോഷ്യല്‍ മീഡിയയില്‍ കുറിച്ചു. ശ്രീജേഷിന്റെ പരിശീലനത്തിന് കീഴില്‍ ജൂനിയര്‍ ഏഷ്യാ കപ്പില്‍ സ്വര്‍ണ്ണവും, ജൂനിയര്‍ ലോകകപ്പിലും സുല്‍ത്താന്‍ ഓഫ് ജോഹര്‍ കപ്പിലും വെങ്കലവും ടീം കരസ്ഥമാക്കിയിരുന്നു. സീനിയര്‍ ടീം കോച്ചിന്റെ താല്പര്യപ്രകാരം ജൂനിയര്‍ തലത്തിലും വിദേശി തന്നെ വേണമെന്നാണ് ഫെഡറേഷന്‍ അറിയിച്ചതെന്ന് അദ്ദേഹം വെളിപ്പെടുത്തി.
ഇന്ത്യന്‍ ഹോക്കിയെ വികസിപ്പിക്കാന്‍ സ്വദേശി പരിശീലകര്‍ക്ക് സാധിക്കില്ലേ എന്ന് അദ്ദേഹം പരിഹസിച്ചു. സീനിയര്‍, ജൂനിയര്‍ വിഭാഗങ്ങളിലെ പുരുഷ-വനിതാ ടീമുകളിലായി ആകെ നാല് പ്രധാന പരിശീലക സ്ഥാനങ്ങളിലും വിദേശികള്‍ക്കാണ് ഫെഡറേഷന്‍ മുന്‍ഗണന നല്‍കുന്നത്. ഈ നയം ദേശീയ പരിശീലകരുടെ ആത്മവീര്യം തകര്‍ക്കുമെന്നും അദ്ദേഹം മുന്നറിയിപ്പ് നല്‍കി. 2036-ലെ ഒളിമ്പിക്‌സിനായി രാജ്യത്തെ കായികരംഗത്തെ സജ്ജമാക്കാന്‍ ശ്രീജേഷിനെപ്പോലുള്ളവര്‍ മുന്നോട്ട് വരണമെന്ന് കേന്ദ്ര കായിക മന്ത്രി മന്‍സുഖ് മാണ്ഡവ്യ ഈ വര്‍ഷം മാര്‍ച്ചില്‍ നിര്‍ദ്ദേശിച്ചിരുന്നു.
എന്നാല്‍ കായിക മന്ത്രിയുടെ ഈ കാഴ്ചപ്പാടിന് വിരുദ്ധമായാണ് ഹോക്കി ഇന്ത്യ ഇപ്പോള്‍ പ്രവര്‍ത്തിക്കുന്നതെന്ന് ശ്രീജേഷ് ചൂണ്ടിക്കാട്ടി. ‘നമ്മുടെ രാജ്യത്തെ ഹോക്കിയെ വളര്‍ത്താന്‍ വിദേശികള്‍ തന്നെ വേണമെന്ന നിര്‍ബന്ധം എന്തിനാണ്? സ്വന്തം രാജ്യത്തെ പരിശീലകരില്‍ വിശ്വാസമര്‍പ്പിക്കാന്‍ അധികൃതര്‍ തയ്യാറാകണം,’ ശ്രീജേഷ് കുറിച്ചു.
