ജയ്പൂര്‍: തിരുവനന്തപുരത്ത് നിന്ന് ഡല്‍ഹിയിലേക്ക് പോവുകയായിരുന്ന രാജധാനി എക്‌സ്പ്രസില്‍ (12431) തീപിടിത്തം. രാജസ്ഥാനിലെ കോട്ടയ്‌ക്ക് സമീപം ഇന്ന് പുലര്‍ച്ചെ 5:15-ഓടെയാണ് സംഭവം. ട്രെയിനിന്റെ എന്‍ജിനിലും ബി1 കോച്ചിലുമാണ് തീ പടര്‍ന്നത്. കൃത്യസമയത്ത് ഇടപെടലുകള്‍ നടത്തിയതിനാല്‍ വന്‍ അപകടം ഒഴിവാകുകയും യാത്രക്കാരെല്ലാം സുരക്ഷിതരാണെന്ന് അധികൃതര്‍ അറിയിക്കുകയും ചെയ്തു.
തീ ശ്രദ്ധയില്‍പ്പെട്ട ഉടന്‍ തന്നെ ട്രെയിന്‍ നിര്‍ത്തുകയും സുരക്ഷാ നടപടികള്‍ ആരംഭിക്കുകയും ചെയ്തു. അപകടം പടരാതിരിക്കാന്‍ എന്‍ജിനും തീപിടിച്ച കോച്ചും ബാക്കി ഭാഗങ്ങളില്‍ നിന്ന് വേര്‍പെടുത്തി. ബി1 കോച്ചിലുണ്ടായിരുന്ന യാത്രക്കാരെ ഉടനടി പുറത്തെത്തിച്ചു. തമിഴ്‌നാട്, കേരളം എന്നിവിടങ്ങളില്‍ നിന്നുള്ള നിരവധി യാത്രക്കാര്‍ ഈ ട്രെയിനില്‍ ഉണ്ടായിരുന്നു.
വെള്ളിയാഴ്ച തിരുവനന്തപുരത്ത് നിന്ന് യാത്ര തിരിച്ച ട്രെയിനാണിത്. തീപിടിത്തത്തിന്റെ കാരണം വ്യക്തമല്ലെന്നും ഇതിനെക്കുറിച്ച് റെയില്‍വേ ഉന്നതതല അന്വേഷണം നടത്തുമെന്നും ഉദ്യോഗസ്ഥര്‍ വ്യക്തമാക്കി. യാത്രക്കാര്‍ക്കായി ബദല്‍ ക്രമീകരണങ്ങള്‍ ഏര്‍പ്പെടുത്തി വരികയാണ്.
