കൊല്‍ക്കത്ത: ബംഗാള്‍ രാഷ്‌ട്രീയത്തില്‍ സിനിമയെ വെല്ലുന്ന പോരാട്ടവീര്യവുമായി ബിജെപിയും തൃണമൂലും നേര്‍ക്കുനേര്‍. താന്‍ സിനിമയിലെ ‘പുഷ്പ’യെപ്പോലെയാണെന്ന് അവകാശപ്പെട്ട തൃണമൂല്‍ നേതാവ് ജഹാംഗീര്‍ ഖാന് മറുപടിയുമായി മുഖ്യമന്ത്രി സുവേന്ദു അധികാരി. ഫാല്‍ട്ടയിലെ തെരഞ്ഞെടുപ്പ് റാലിയെ അഭിസംബോധന ചെയ്യവെയാണ് സുവേന്ദു കടുത്ത ഭാഷയില്‍ വെല്ലുവിളി നടത്തിയത്. ‘ഈ പുഷ്പയുടെ ഉത്തരവാദിത്വം ഇപ്പോള്‍ എനിക്കാണ്. അയാളെ എങ്ങനെ കൈകാര്യം ചെയ്യണമെന്ന് എനിക്കറിയാം അദ്ദേഹം പറഞ്ഞു.
ബംഗാളിലെ ഫാല്‍ട്ട മണ്ഡലത്തില്‍ വോട്ടെടുപ്പിനിടെ നടന്ന അക്രമ സംഭവങ്ങളാണ് നിലവിലെ വാക്‌പോരിലേക്ക് നയിച്ചത്. ആദ്യഘട്ട വോട്ടെടുപ്പില്‍ ബിജെപി പ്രവര്‍ത്തകരെ വോട്ട് ചെയ്യാന്‍ അനുവദിക്കാത്തതിനെത്തുടര്‍ന്ന് മെയ് 21-ന് മണ്ഡലത്തില്‍ റീപോളിംഗ് നിശ്ചയിച്ചിരിക്കുകയാണ്. ക്രമസമാധാന ചുമതലയുള്ള എന്‍കൗണ്ടര്‍ സ്‌പെഷ്യലിസ്റ്റ് അജയ് പാല്‍ ശര്‍മ്മ തന്നെ സന്ദര്‍ശിച്ചതിന് പിന്നാലെയാണ് ജഹാംഗീര്‍ ഖാന് സ്വയം ‘പുഷ്പ’ എന്ന് വിശേഷിപ്പിച്ചത്.
മയക്കുമരുന്ന് മാഫിയയിലൂടെ വളര്‍ന്ന സിനിമാ കഥാപാത്രത്തെപ്പോലെ താനും കരുത്തനാണെന്നായിരുന്നു ഖാന്റെ അവകാശവാദം. തൃണമൂല്‍ സ്ഥാനാര്‍ത്ഥി കൂടിയായ ജഹാംഗീര്‍ ഖാന് കുപ്രസിദ്ധ ക്രിമിനലാണെന്നും റീപോളിംഗില്‍ ബിജെപി ശക്തമായി തിരിച്ചടിക്കുമെന്നും സുവേന്ദു പ്രഖ്യാപിച്ചു. മമത ബാനര്‍ജിയുടെ മരുമകന്‍ അഭിഷേക് ബാനര്‍ജി പ്രതിനിധീകരിക്കുന്ന ഡയമണ്ട് ഹാര്‍ബര്‍ ലോക്‌സഭാ മണ്ഡലത്തിന് കീഴിലാണ് ഫാല്‍ട്ട നിയമസഭാ മണ്ഡലം വരുന്നത്.
294 മണ്ഡലങ്ങളുള്ള ബംഗാളില്‍ ഫാല്‍ട്ടയിലെ ഫലം വരാത്തതിനാല്‍ നിലവില്‍ 293 സീറ്റുകളിലെ ഫലം മാത്രമേ പുറത്തു വന്നിട്ടുള്ളൂ. മെയ് 24-ന് നടക്കുന്ന വോട്ടെണ്ണലിലൂടെ ഫാല്‍ട്ട ആര്‍ക്കൊപ്പം നില്‍ക്കുമെന്ന് വ്യക്തമാകും.
