ഒസ്ലോ: നോര്വേ തലസ്ഥാനമായ ഒസ്ലോയില് നടന്ന മൂന്നാമത് ഇന്ത്യ-നോര്ഡിക് ഉച്ചകോടിയില് ആഗോള ഭീകരവാദത്തിനെതിരെ കടുത്ത നിലപാട് ആവര്ത്തിച്ച് പ്രധാനമന്ത്രി നരേന്ദ്ര മോദി. ഭീകരവാദമെന്ന ആഗോള വിപത്തിനെ നേരിടാന് അന്താരാഷ്ട്ര സമൂഹം യാതൊരുവിധ വിട്ടുവീഴ്ചയുമില്ലാതെ ഒന്നിച്ച് നില്ക്കണമെന്ന് പ്രധാനമന്ത്രി ആവശ്യപ്പെട്ടു. നോര്വേ, ഡെന്മാര്ക്ക്, ഫിന്ലന്ഡ്, ഐസ്ലന്ഡ്, സ്വീഡന് എന്നീ അഞ്ച് വടക്കന് യൂറോപ്യന് രാജ്യങ്ങളിലെ ഭരണത്തലവന്മാരാണ് ഈ തന്ത്രപ്രധാന ഉച്ചകോടിയില് പങ്കെടുത്തത്.
ഭീകരവാദത്തോടുള്ള സമീപനത്തില് ഇന്ത്യക്കും നോര്ഡിക് രാജ്യങ്ങള്ക്കും ഒരേ സ്വരമാണുള്ളതെന്ന് ഉച്ചകോടിക്ക് ശേഷമുള്ള സംയുക്ത വാര്ത്താസമ്മേളനത്തില് പ്രധാനമന്ത്രി വ്യക്തമാക്കി. ഈ വിഷയത്തില് ഒരു തരത്തിലുള്ള ഇരട്ടത്താപ്പും വെച്ചുപൊറുപ്പിക്കാനാകില്ലെന്ന് അദ്ദേഹം കൂട്ടിച്ചേര്ത്തു. ഇതിനൊപ്പം, ഐക്യരാഷ്ട്രസഭ ഉള്പ്പെടെയുള്ള ആഗോള സംഘടനകളില് കാലോചിതമായ പരിഷ്കാരങ്ങള് കൊണ്ടുവരേണ്ടത് ലോകസമാധാനത്തിന് അത്യന്താപേക്ഷിതമാണെന്ന് ഉച്ചകോടിയില് പങ്കെടുത്ത നേതാക്കള് ഐകകണ്ഠ്യേന വിലയിരുത്തി.
പ്രതിരോധ ചര്ച്ചകള്ക്ക് പുറമെ, ഇരുവിഭാഗങ്ങളും തമ്മിലുള്ള സാമ്പത്തിക-വ്യാപാര സഹകരണം കൂടുതല് വിപുലമാക്കാനും ഉച്ചകോടിയില് തീരുമാനമായി. കഴിഞ്ഞ ഒരു ദശാബ്ദത്തിനിടെ ഇന്ത്യയും നോര്ഡിക് മേഖലയും തമ്മിലുള്ള ഉഭയകക്ഷി വ്യാപാരത്തില് നാലിരട്ടി വര്ദ്ധനവാണ് രേഖപ്പെടുത്തിയിട്ടുള്ളതെന്ന് പ്രധാനമന്ത്രി ചൂണ്ടിക്കാട്ടി. ഉച്ചകോടിയുടെ ഭാഗമായി പ്രധാനമന്ത്രി നരേന്ദ്ര മോദി വിവിധ രാജ്യങ്ങളിലെ ഭരണത്തലവന്മാരുമായി വ്യക്തിപരമായി കൂടിക്കാഴ്ച നടത്തി.
ഐസ്ലന്ഡ് പ്രധാനമന്ത്രി ക്രിസ്ട്രൂണ് ഫ്രോസ്റ്റാഡോട്ടിറുമായയും ഫിന്ലന്ഡ് പ്രധാനമന്ത്രി പെറ്റേരി ഓര്പോയുമായും, ഡെന്മാര്ക്ക് പ്രധാനമന്ത്രി മെറ്റെ ഫ്രെഡറിക്സണുമായി പ്രത്യേക ഉഭയകക്ഷി ചര്ച്ചകള് നടത്തി. ഈ രാജ്യങ്ങളുമായുള്ള ഹരിത പങ്കാളിത്തം, ഡിജിറ്റല് നവീകരണം, സുസ്ഥിര വികസനം എന്നീ മേഖലകളിലെ സഹകരണം കൂടുതല് ശക്തമാക്കാന് ഈ കൂടിക്കാഴ്ചകള് വഴിയൊരുക്കുമെന്നാണ് വിലയിരുത്തപ്പെടുന്നത്.
