ന്യൂഡല്ഹി: ‘യുവാക്കളുടെ, യുവാക്കള്ക്ക് വേണ്ടിയുള്ള, യുവാക്കള് നയിക്കുന്ന രാഷ്ട്രീയ മുന്നണി’ എന്ന മുദ്രാവാക്യവുമായി സോഷ്യല് മീഡിയയില് ഉയര്ന്നുവന്ന ‘കോക്രോച്ച് ജനതാ പാര്ട്ടി’യുടെ (സിജെപി) ഔദ്യോഗിക എക്സ് (ട്വിറ്റര്) അക്കൗണ്ട് ഇന്ത്യയില് ബ്ലോക്ക് ചെയ്തു. പ്രശാന്ത് ഭൂഷണ്, അഞ്ജലി ഭരദ്വാജ്, തൃണമൂല് കോണ്ഗ്രസ് എംപിമാരായ മഹുവ മൊയ്ത്ര, കീര്ത്തി ആസാദ് തുടങ്ങിയ പ്രമുഖര് ഈ പ്രസ്ഥാനത്തില് ചേരാന് ഒരുങ്ങുന്നതിനിടെയാണ് പാര്ട്ടിക്കെതിരെയുള്ള ഈ നീക്കം.
അമേരിക്കയിലിരുന്നാണ് സിജെപിയുടെ സ്ഥാപകനായ 30-കാരന് അഭിജീത് ദിപ്കെ പാര്ട്ടിയുടെ പ്രവര്ത്തനങ്ങള് ഏകോപിപ്പിക്കുന്നത്. 2020-നും 2023-നും ഇടയില് ആം ആദ്മി പാര്ട്ടിയുടെ സോഷ്യല് മീഡിയ വിഭാഗത്തില് പ്രവര്ത്തിച്ചിരുന്ന അഭിജീത്, നിലവില് യുണൈറ്റഡ് സ്റ്റേറ്റ്സിലെ ബോസ്റ്റണ് യൂണിവേഴ്സിറ്റിയില് പബ്ലിക് റിലേഷന്സില് മാസ്റ്റേഴ്സ് ബിരുദ വിദ്യാര്ത്ഥിയാണ്.
മേയ് 15-ന് നടന്ന ഒരു കോടതി വാദത്തിനിടയില്, സോഷ്യല് മീഡിയയില് സജീവമായ ചില ഉദ്യോഗസ്ഥരെയും യുവാക്കളെയും സുപ്രീം കോടതി ചീഫ് ജസ്റ്റിസ് ‘പാറ്റകള്’ , ‘പരാദങ്ങള്’ എന്നിവയോട് ഉപമിച്ചു എന്ന രീതിയില് വാര്ത്തകള് പ്രചരിച്ചിരുന്നു. (തന്റെ വാക്കുകള് തെറ്റായി വ്യാഖ്യാനിച്ചതാണെന്ന് ചീഫ് ജസ്റ്റിസ് പിന്നീട് വ്യക്തമാക്കുകയുണ്ടായി). എന്നാല്, ഈ പ്രയോഗത്തില് പ്രകോപിതരായ ഒരു വിഭാഗം യുവാക്കള് ഇതൊരു കാമ്പെയ്നായി ഏറ്റെടുക്കുകയും, അത് ഒടുവില് ‘കോക്രോച്ച് ജനതാ പാര്ട്ടി’ എന്ന സംഘടനയുടെ രൂപീകരണത്തില് കലാശിക്കുകയുമായിരുന്നൂ.
ഇന്സ്റ്റാഗ്രാമില് 15 ദശലക്ഷത്തിലധികം (1.5 കോടി) ഫോളോവേഴ്സാണ് കോക്രോച്ച് ജനതാ പാര്ട്ടിക്കുള്ളത്. എന്നാല് ഇതില് ഭൂരിഭാഗവും പാകിസ്ഥാന്, ബംഗ്ലാദേശ്, തുര്ക്കി തുടങ്ങിയ വിദേശ രാജ്യങ്ങളില് നിന്നുള്ളവരാണെന്നും, ഇന്ത്യന് ഫോളോവേഴ്സ് വളരെ ചെറിയൊരു ശതമാനം മാത്രമാണെന്നുമാണ് റിപ്പോര്ട്ടുകള്. ഇന്ത്യയില് നിന്ന് എസ്.ഡി.പി.ഐ, ആം ആദ്മി പാര്ട്ടി (എ.എ.പി) എന്നീ രാഷ്ട്രീയ സംഘടനകള് കോക്രോച്ച് ജനതാ പാര്ട്ടിക്ക് പിന്നില് നിന്ന് പിന്തുണ നല്കുന്നുണ്ടെന്നാണ് സൂചനകള് വ്യക്തമാക്കുന്നത്.
