ന്യൂഡൽഹി: രാജ്യത്തെ ഉദ്യോഗാർത്ഥികൾക്ക് ദീപാവലി സമ്മാനവുമായി കേന്ദ്ര സർക്കാരിന്റെ അടുത്ത റോസ്‌ഗാർ മേള നാളെ നടക്കും. 19-ാമത് റോസ്‌ഗാർ മേളയിലൂടെ വിവിധ കേന്ദ്ര സർക്കാർ വകുപ്പുകളിലേക്കും സ്ഥാപനങ്ങളിലേക്കുമായി തിരഞ്ഞെടുക്കപ്പെട്ട 51,000-ത്തിലധികം യുവാക്കൾക്കാണ് പ്രധാനമന്ത്രി നരേന്ദ്ര മോദി നാളെ രാവിലെ നിയമന ഉത്തരവുകൾ വിതരണം ചെയ്യുന്നത്. വീഡിയോ കോൺഫറൻസിങ് വഴി നടക്കുന്ന ചടങ്ങിൽ പ്രധാനമന്ത്രി ഉദ്യോഗാർത്ഥികളെ അഭിസംബോധന ചെയ്ത് സംസാരിക്കുകയും ചെയ്യും.
രാജ്യത്തുടനീളമുള്ള 47 കേന്ദ്രങ്ങളിലായിട്ടാണ് ഇത്തവണത്തെ റോസ്‌ഗാർ മേള സംഘടിപ്പിച്ചിരിക്കുന്നത്. ഇന്ത്യയുടെ വിവിധ ഭാഗങ്ങളിൽ നിന്നായി കഠിനപ്രയത്നത്തിലൂടെ തിരഞ്ഞെടുക്കപ്പെട്ട ഉദ്യോഗാർത്ഥികൾ നാളെ മുതൽ തങ്ങളുടെ പുതിയ കരിയറിലേക്ക് ചുവടുവെക്കും. റെയിൽവേ മന്ത്രാലയം, ആഭ്യന്തര മന്ത്രാലയം, ആരോഗ്യ-കുടുംബക്ഷേമ മന്ത്രാലയം, ധനകാര്യ സേവന വകുപ്പ്, ഉന്നത വിദ്യാഭ്യാസ വകുപ്പ് തുടങ്ങി നിരവധി പ്രമുഖ മന്ത്രാലയങ്ങളിലേക്കും വകുപ്പുകളിലേക്കുമാണ് ഈ നിയമനങ്ങൾ നടക്കുന്നത്.
തൊഴിലവസരങ്ങൾ സൃഷ്ടിക്കുന്നതിന് മുൻഗണന നൽകുമെന്ന പ്രധാനമന്ത്രി നരേന്ദ്ര മോദിയുടെ ദൃഢനിശ്ചയത്തിന്റെ ഭാഗമായാണ് റോസ്‌ഗാർ മേള രാജ്യത്ത് തുടർച്ചയായി സംഘടിപ്പിച്ചുപോരുന്നത്. ഈ കാഴ്ചപ്പാട് യാഥാർത്ഥ്യമാക്കുന്നതിൽ പദ്ധതി വലിയ വിജയമാണ് കൈവരിച്ചിരിക്കുന്നത്. ഇതിനോടകം രാജ്യത്തുടനീളം സംഘടിപ്പിച്ച 18 റോസ്‌ഗാർ മേളകളിലൂടെ ഏകദേശം 12 ലക്ഷത്തോളം ഉദ്യോഗാർത്ഥികൾക്കാണ് വിവിധ സർക്കാർ വകുപ്പുകളിൽ നിയമന ഉത്തരവുകൾ നൽകാൻ സാധിച്ചത്. ഈ വൻ വിജയത്തിന്റെ തുടർച്ചയായാണ് നാളെ നടക്കുന്ന പത്തൊൻപതാമത് മേള.
