പത്തനംതിട്ട: രാജ്യത്തിന്റെ പ്രധാനമന്ത്രിയിൽ നിന്ന് നേരിട്ടൊരു അഭിനന്ദനക്കത്ത് ലഭിക്കുക! പത്തനംതിട്ട തിരുവല്ല തോട്ടഭാഗം സ്വദേശിയായ അക്ഷയ് എന്ന യുവാവിന് ഇപ്പോൾ ആ വലിയ സന്തോഷത്തിന്റെ നിമിഷമാണ്. ശാരീരിക വെല്ലുവിളികളെ കാറ്റിൽപ്പറത്തി ഡിജിറ്റൽ പെയിന്റിംഗിലും ഫോട്ടോഗ്രാഫിയിലും വിസ്മയം തീർക്കുന്ന അക്ഷയ്ക്ക്, പ്രധാനമന്ത്രി നരേന്ദ്ര മോദി ഒപ്പിട്ട ആശംസാകത്താണ് ഡൽഹിയിലെ പ്രധാനമന്ത്രിയുടെ ഓഫീസിൽ നിന്ന് തേടിയെത്തിയിരിക്കുന്നത്.
തെരഞ്ഞെടുപ്പ് പ്രചാരണത്തിനായി പ്രധാനമന്ത്രി കേരളത്തിലെത്തിയപ്പോൾ അക്ഷയ് നൽകിയ ഒരു പ്രത്യേക സമ്മാനമാണ് ഈ സർപ്രൈസ് കത്തിന് പിന്നിൽ. തന്റെ ജീവിതത്തിലെ ഏറ്റവും വലിയ ഭാഗ്യങ്ങളിലൊന്ന് കൈപ്പിടിയിലൊതുങ്ങിയ സന്തോഷത്തിലാണ് ഇപ്പോൾ ഈ യുവ കലാകാരനും കുടുംബവും. എൻഡിഎയുടെ തെരഞ്ഞെടുപ്പ് പ്രചാരണ വേദിയിൽ വെച്ചാണ് ഈ അപൂർവ്വ നിമിഷത്തിന് വഴിയൊരുങ്ങിയത്. ബ്ലോക്ക് പഞ്ചായത്ത് മെമ്പർ ദിനേഷ് നൽകിയ പാസ് വഴിയാണ് അക്ഷയ് പരിപാടിയിൽ പങ്കെടുക്കാൻ എത്തിയത്. സദസ്സിന്റെ മുൻനിരയിലിരുന്ന് അക്ഷയ് താൻ വരച്ച പ്രധാനമന്ത്രിയുടെ മനോഹരമായ ഒരു ഡിജിറ്റൽ പെയിന്റിംഗ് ഉയർത്തിപ്പിടിക്കുകയായിരുന്നു.
വേദിയിൽ നിന്നുകൊണ്ട് തന്നെ ഈ ചിത്രം ശ്രദ്ധയിൽപ്പെട്ട പ്രധാനമന്ത്രി, അത് വാങ്ങി നൽകാൻ തന്റെ സുരക്ഷാ ഉദ്യോഗസ്ഥരായ എസ്പിജിയോട് ആവശ്യപ്പെടുകയായിരുന്നു. ചിത്രത്തിന് പിന്നിൽ അക്ഷയ് തന്റെ വീട്ടുപേരും വിലാസവും കൃത്യമായി കുറിച്ചിട്ടുണ്ടായിരുന്നു.
ഡൽഹിയിലെത്തിയ ശേഷം ചിത്രം കണ്ട് ഇഷ്ടപ്പെട്ട പ്രധാനമന്ത്രി, അക്ഷയുടെ വിലാസത്തിലേക്ക് നേരിട്ട് കത്തയക്കുകയായിരുന്നു.
ഇത്തരമൊരു മറുപടി കത്ത് പ്രധാനമന്ത്രിയുടെ ഓഫീസിൽ നിന്നും വരുമെന്ന് താൻ ഒട്ടും പ്രതീക്ഷിച്ചിരുന്നില്ലെന്ന് അക്ഷയ് പറയുന്നു. പ്രധാനമന്ത്രിയുടെ സ്വന്തം ഒപ്പോടു കൂടിയുള്ള ഈ കത്ത് തുടർയാത്രകൾക്ക് വലിയൊരു ഊർജ്ജവും അനുഗ്രഹവുമായി മാറിയിരിക്കുകയാണ്.
