വാഷിംഗ്ടൺ: ഹോർമുസ് കടലിടുക്ക് തുറക്കണമെന്ന അന്താരാഷ്ട്ര ആവശ്യം നടപ്പാക്കാൻ ഇറാൻ തയ്യാറാകാത്തപക്ഷം, ശക്തമായ ‘പ്ലാൻ ബി’ നടപ്പിലാക്കാൻ യുഎസ് നിർബന്ധിതരാകുമെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ വ്യക്തമാക്കി. തന്ത്രപ്രധാനമായ ഹോർമുസ് പാത പൂർണ്ണമായും തുറന്നുനൽകാനും, തങ്ങളുടെ ആണവ ശേഖരം പൂർണ്ണമായി നശിപ്പിക്കാനും ഇറാനോട് യുഎസ് ഔദ്യോഗികമായി ആവശ്യപ്പെട്ടിട്ടുണ്ട്. നിലവിൽ ഇരുരാജ്യങ്ങളും തമ്മിലുള്ള ചർച്ചകൾ പുരോഗമിക്കുകയാണെന്നും, ഒരു നയതന്ത്ര ധാരണയിൽ എത്തിച്ചേരുക എന്നത് തന്നെയാണ് തങ്ങളുടെ പ്രഥമ ലക്ഷ്യമെന്നും റൂബിയോ കൂട്ടിച്ചേർത്തു.
നേരത്തെ ഇറാൻ മുന്നോട്ടുവെച്ച സമാധാന നിർദ്ദേശങ്ങൾ യുഎസ് വിശദമായി പരിശോധിച്ചിരുന്നു. തുടർന്ന് യുഎസിന്റെ ആവശ്യങ്ങളും ഭേദഗതികളും ഉൾപ്പെടുത്തിയുള്ള പുതുക്കിയ നിർദ്ദേശങ്ങൾ ഇറാനിലേക്ക് തിരിച്ചയക്കുകയും ചെയ്തു. ഇതിന്റെ അടിസ്ഥാനത്തിലുള്ള തുടർച്ചർച്ചകളാണ് ഇപ്പോൾ ഇരുപക്ഷത്തും സജീവമായി നടക്കുന്നത്.
എന്നിരുന്നാലും, ഈ നയതന്ത്ര ചർച്ചകൾ പരാജയപ്പെട്ടാൽ ഇറാനെതിരെ ശക്തമായ സൈനിക നടപടി സ്വീകരിക്കുമെന്ന സൂചന യുഎസ് മുൻപ് തന്നെ നൽകിയിട്ടുണ്ട്. ചർച്ചകൾ ഫലം കണ്ടില്ലെങ്കിൽ അടുത്ത ഘട്ടമായി സൈനിക നീക്കത്തിലേക്ക് കടക്കുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപും വ്യക്തമാക്കിയ സാഹചര്യത്തിൽ, റൂബിയോയുടെ പുതിയ പ്രസ്താവന ആഗോളതലത്തിൽ വലിയ പ്രാധാന്യത്തോടെയാണ് വിലയിരുത്തപ്പെടുന്നത്.
