സിംഗപ്പൂര്‍ ഓപ്പണ്‍: പി.വി. സിന്ധുവിനും സാത്വിക്-ചിരാഗ് സഖ്യത്തിനും വിജയത്തുടക്കം; ആയുഷ് ഷെട്ടി പുറത്ത്

സിംഗപ്പൂര്‍: സിംഗപ്പൂര്‍ ഓപ്പണ്‍ ബാഡ്മിന്റണ്‍ ടൂര്‍ണമെന്റില്‍ ഇന്ത്യയുടെ മുതിര്‍ന്ന താരങ്ങളായ പി.വി. സിന്ധുവിനും പുരുഷ ഡബിള്‍സ് സഖ്യമായ സാത്വിക്‌സായിരാജ് രങ്കിറെഡ്ഡി – ചിരാഗ് ഷെട്ടി സഖ്യത്തിനും വിജയത്തുടക്കം. സിംഗപ്പൂര്‍ ഇന്‍ഡോര്‍ സ്റ്റേഡിയത്തില്‍ നടന്ന മത്സരങ്ങളില്‍ വിജയം കണ്ട ഇന്ത്യന്‍ താരങ്ങള്‍ അടുത്ത റൗണ്ടിലേക്ക് യോഗ്യത നേടി.

വനിതാ സിംഗിള്‍സില്‍ രണ്ട് തവണ ഒളിമ്പിക് മെഡല്‍ ജേതാവായ പി.വി. സിന്ധു, ഇന്തോനേഷ്യയുടെ പുത്രി കുസുമ വര്‍ദാനിയെ നേരിട്ടുള്ള ഗെയിമുകള്‍ക്ക് പരാജയപ്പെടുത്തി (2117, 2118). ടൂര്‍ണമെന്റിലെ അഞ്ചാം സീഡായ ഇന്തോനേഷ്യന്‍ താരത്തിനെതിരെ നേടിയ ഈ വിജയത്തോടെ, അവര്‍ക്കെതിരെയുള്ള സിന്ധുവിന്റെ നേര്‍ക്കുനേര്‍ പോരാട്ടങ്ങളുടെ റെക്കോര്‍ഡ് 3-3 എന്ന നിലയിലായി.

ആദ്യ ഗെയിമിന്റെ തുടക്കത്തില്‍ നാല് പോയിന്റുകളുടെ ലീഡുമായി സിന്ധു മികച്ച മുന്നേറ്റം നടത്തി. മത്സരത്തിനിടയില്‍ ചെറിയൊരു തിരിച്ചടി നേരിട്ടെങ്കിലും, റിയോ ഒളിമ്പിക്‌സിലെ വെള്ളി മെഡല്‍ ജേതാവും 2021-ല്‍ നടന്ന ടോക്കിയോ ഗെയിംസിലെ വെങ്കല മെഡല്‍ ജേതാവുമായ സിന്ധു, തകര്‍പ്പന്‍ തിരിച്ചുവരവിലൂടെ 16-16 എന്ന നിലയില്‍ ഒപ്പമെത്തി. തുടര്‍ന്ന് തുടര്‍ച്ചയായി അഞ്ച് പോയിന്റുകള്‍ നേടി ആദ്യ ഗെയിം സ്വന്തമാക്കി. രണ്ടാം ഗെയിമില്‍ ഓരോ പോയിന്റിനായും കടുത്ത പോരാട്ടമാണ് നടന്നത്. എന്നാല്‍ നിര്‍ണായക നിമിഷങ്ങളില്‍ ലീഡ് നിലനിര്‍ത്തിയ സിന്ധു മത്സരം കൈക്കലാക്കുകയായിരുന്നു. പ്രീ-ക്വാര്‍ട്ടറില്‍ ജപ്പാന്റെ റിക്കോ ഗുഞ്ജിയാണ് സിന്ധുവിന്റെ അടുത്ത എതിരാളി.

പുരുഷ ഡബിള്‍സില്‍ ലോക നാലാം നമ്പര്‍ സഖ്യമായ സാത്വിക് – ചിരാഗ് ജോഡി, ചെന്‍ സി യി – പ്രെസ്ലി സ്മിത്ത് സഖ്യത്തെ ഒന്നിനെതിരെ രണ്ട് ഗെയിമുകള്‍ക്ക് പരാജയപ്പെടുത്തി (26-28, 21-15, 21-13). കടുത്ത പോരാട്ടം കണ്ട ആദ്യ ഗെയിമില്‍ ഏഴ് ഗെയിം പോയിന്റുകള്‍ രക്ഷപ്പെടുത്തിയിട്ടും ഇന്ത്യന്‍ സഖ്യത്തിന് അത് നഷ്ടമായിരുന്നു. എന്നാല്‍ ശക്തമായി തിരിച്ചടിച്ച ഇന്ത്യന്‍ സഖ്യം രണ്ടാം ഗെയിം നേടി മത്സരം നിര്‍ണായകമായ മൂന്നാം ഗെയിമിലേക്ക് നീട്ടുകയും, മൂന്നാം ഗെയിമില്‍ പൂര്‍ണ്ണ ആധിപത്യം പുലര്‍ത്തി 21-13 ന് വിജയം ഉറപ്പിക്കുകയുമായിരുന്നു. ഒരു മണിക്കൂറും 15 മിനിറ്റും നീണ്ടുനിന്ന പോരാട്ടത്തിനൊടുവിലാണ് ഇന്ത്യന്‍ സഖ്യം വിജയിച്ചത്. റൗണ്ട് ഓഫ് 16-ല്‍ ചൈനീസ് തായ്പേയിയുടെ ലീ ജെ-ഹൂയി – യാങ് പോ-ഹ്‌സുവാന്‍ സഖ്യത്തെയാണ് ഇവര്‍ നേരിടുക.

എന്നാല്‍ പുരുഷ സിംഗിള്‍സില്‍ ഇന്ത്യന്‍ താരം ആയുഷ് ഷെട്ടി വിക്ടര്‍ ലായിക്കെതിരെ മികച്ച പോരാട്ടം കാഴ്ചവെച്ചെങ്കിലും പരാജയപ്പെട്ടു. ആദ്യ ഗെയിം 21-11 ന് വളരെ എളുപ്പത്തില്‍ സ്വന്തമാക്കിയ ആയുഷിന്, തുടര്‍ന്നുള്ള ഗെയിമുകളില്‍ ആ മികവ് നിലനിര്‍ത്താനായില്ല. 14-21, 12-21 എന്ന സ്‌കോറിനാണ് താരം പരാജയം സമ്മതിച്ചത്. ആദ്യ ദിനത്തില്‍ കളത്തിലിറങ്ങിയ മറ്റ് ഇന്ത്യന്‍ താരങ്ങളും തങ്ങളുടെ എതിരാളികളോട് പരാജയപ്പെട്ടു.