മെസിയോ യമാലോ? ലോകകപ്പ് ഫൈനലിനായി കോടികള്‍ ചെലവിടാന്‍ തയ്യാറായി ആരാധകര്‍; യുഎസ് കായിക ചരിത്രത്തിലെ ഏറ്റവും ചെലവേറിയ മത്സരമായി ഫൈനല്‍

ന്യൂയോര്‍ക്ക്: ലോകം കാത്തിരിക്കുന്ന അര്‍ജന്റീന-സ്പെയിന്‍ ഫിഫ ലോകകപ്പ് 2026 ഫൈനല്‍ യുഎസ് കായിക ചരിത്രത്തിലെ ഏറ്റവും ചെലവേറിയ മത്സരമായി മാറാന്‍ ഒരുങ്ങുന്നു. ലയണല്‍ മെസിയും ലമീന്‍ യമാലും നേര്‍ക്കുനേര്‍ എത്തുന്ന കലാശപ്പോരിന് ടിക്കറ്റ് സ്വന്തമാക്കാന്‍ ആരാധകര്‍ ലക്ഷങ്ങള്‍ മുതല്‍ കോടികള്‍ വരെ മുടക്കാന്‍ തയ്യാറായിരിക്കുകയാണ്.

ഫോര്‍ബ്‌സ് റിപ്പോര്‍ട്ട് പ്രകാരം, ന്യൂജഴ്സിയിലെ മെറ്റ്ലൈഫ് സ്റ്റേഡിയത്തില്‍ നടക്കുന്ന ഫൈനലിന്റെ ഏറ്റവും കുറഞ്ഞ ടിക്കറ്റ് വില 6,943 ഡോളര്‍ (ഏകദേശം 5.8 ലക്ഷം രൂപ) ആണ്. രണ്ടാം സെമിഫൈനലായ അര്‍ജന്റീന-ഇംഗ്ലണ്ട് മത്സരത്തിന്റെ കുറഞ്ഞ നിരക്കായ 7,200 ഡോളറിനേക്കാള്‍ അല്‍പം കുറവാണെങ്കിലും, ആരാധകരുടെ ആവേശം കാരണം ടിക്കറ്റ് വില റെക്കോര്‍ഡ് ഉയരത്തിലെത്തി.

പ്രമുഖ ടിക്കറ്റ് പ്ലാറ്റ്ഫോമായ ടിക്പിക് പുറത്തുവിട്ട കണക്കുകള്‍ പ്രകാരം, ഫൈനലിന്റെ ശരാശരി ടിക്കറ്റ് വില 11,327 ഡോളര്‍ (ഏകദേശം 9.5 ലക്ഷം രൂപ) ആണ്. അമേരിക്കയില്‍ ഇതുവരെ നടന്ന ഏതൊരു കായിക മത്സരത്തിന്റെയും ഏറ്റവും ഉയര്‍ന്ന ശരാശരി ടിക്കറ്റ് നിരക്കാണിത്. അതിലും ശ്രദ്ധേയമായത് ഏറ്റവും വിലകൂടിയ ടിക്കറ്റാണ്. മെറ്റ്ലൈഫ് സ്റ്റേഡിയത്തിലെ സെക്ഷന്‍ 115എയിലെ ഒരു സീറ്റിന് 28,479 ഡോളര്‍ (ഏകദേശം 23.8 ലക്ഷം രൂപ) വരെ വില ഉയര്‍ന്നിരിക്കുകയാണ്.

ഇതിന് മുമ്പ് അമേരിക്കയിലെ ഏറ്റവും ചെലവേറിയ കായിക മത്സരമെന്ന റെക്കോര്‍ഡ് 2024 സൂപ്പര്‍ ബൗള്‍ ഫൈനലിനായിരുന്നു. സാന്‍ ഫ്രാന്‍സിസ്‌കോ 49േഴ്‌സും കാന്‍സാസ് സിറ്റി ചീഫ്‌സും തമ്മിലുള്ള ആ മത്സരത്തിന്റെ ശരാശരി ടിക്കറ്റ് വില 9,411 ഡോളര്‍ ആയിരുന്നു. ലോകകപ്പ് ഫൈനല്‍ ആ റെക്കോര്‍ഡും പിന്നിലാക്കി.