ന്യൂയോര്‍ക്ക്: ലോകകപ്പ് ഫൈനലെന്ന സ്വപ്‌നം തകര്‍ന്നതിന് പിന്നാലെ ലൂസേഴ്സ് ഫൈനല്‍ കളിക്കേണ്ടി വന്നതിലുള്ള നിരാശ തുറന്നുപറഞ്ഞ് ഫ്രാന്‍സ് പരിശീലകന്‍ ദിദിയെ ദെഷാം. ഇംഗ്ലണ്ടിനെതിരായ മൂന്നാം സ്ഥാനപ്പോരാട്ടം കളിക്കാന്‍ ഫ്രാന്‍സിനോ ഇംഗ്ലണ്ടിനോ ആഗ്രഹമില്ലായിരുന്നുവെന്നും, എന്നാല്‍ ദേശീയ ടീമിനോടും ഫുട്‌ബോളിനോടുമുള്ള ഉത്തരവാദിത്തത്തിന്റെ ഭാഗമായി മത്സരം കളിക്കുമെന്നും അദ്ദേഹം വ്യക്തമാക്കി.
സ്‌പെയിനിനോട് സെമിഫൈനലില്‍ 2-0ന് പരാജയപ്പെട്ടതോടെയാണ് ഫ്രാന്‍സിന്റെ തുടര്‍ച്ചയായ മൂന്നാം ലോകകപ്പ് ഫൈനല്‍ സ്വപ്‌നം അവസാനിച്ചത്. പ്രീ-മാച്ച് വാര്‍ത്താസമ്മേളനത്തില്‍ സംസാരിക്കവേ, മത്സരത്തിന്റെ പ്രാധാന്യം കുറച്ചുകാണുന്നില്ലെന്നും ജയിക്കാനാണ് ടീമിന്റെ ലക്ഷ്യമെന്നും ദെഷാം പറഞ്ഞു. ഫ്രാന്‍സിന്റെ ജഴ്സി അണിയുമ്പോള്‍ വിജയമല്ലാതെ മറ്റൊരു ലക്ഷ്യവുമില്ലെന്നും അദ്ദേഹം കൂട്ടിച്ചേര്‍ത്തു.
ദേശീയ ടീമിന്റെ പരിശീലകനെന്ന നിലയില്‍ തന്റെ അവസാന മത്സരമായതിനാല്‍ വെങ്കല മെഡലോടെ വിടപറയാനാണ് ആഗ്രഹമെന്നും അദ്ദേഹം വ്യക്തമാക്കി. അതേസമയം, പരിശീലകനായ ദെഷാമിന് വിജയത്തോടെ യാത്രയയപ്പ് നല്‍കാനാണ് ടീമിന്റെ തീരുമാനം എന്ന് ഫ്രഞ്ച് പ്രതിരോധതാരം ഇബ്രാഹിമ കൊനാട്ടെയും വ്യക്തമാക്കി. ഇംഗ്ലണ്ടും ഫ്രാന്‍സും തമ്മിലുള്ള മൂന്നാം സ്ഥാനപ്പോരാട്ടം ഇന്ത്യന്‍ സമയം ശനിയാഴ്ച രാത്രി ഫ്‌ലോറിഡയില്‍ അരങ്ങേറും. ലോകകപ്പ് മെഡല്‍ സ്വന്തമാക്കി ടൂര്‍ണമെന്റ് അവസാനിപ്പിക്കാനാണ് ഇരു ടീമുകളുടെയും ലക്ഷ്യം.
