സിംഗപ്പൂര്‍: ബി.ഡബ്ല്യു.എഫ് സിംഗപ്പൂര്‍ ഓപ്പണ്‍ ബാഡ്മിന്റണില്‍ ഇന്ത്യക്ക് സമ്മിശ്ര ദിനം. പുരുഷ ഡബിള്‍സിലും മിക്‌സഡ് ഡബിള്‍സിലും ഇന്ത്യന്‍ സഖ്യങ്ങള്‍ സെമിഫൈനലില്‍ പ്രവേശിച്ചപ്പോള്‍, സിംഗിള്‍സില്‍ ഇന്ത്യന്‍ താരങ്ങളെല്ലാം പുറത്തായി. പുരുഷ ഡബിള്‍സില്‍ മുന്‍ ലോക ഒന്നാം നമ്പര്‍ സഖ്യമായ സാത്വിക് സായ്രാജ് രങ്കിറെഡ്ഡി – ചിരാഗ് ഷെട്ടി സഖ്യമാണ് സെമിയിലെത്തിയത്. ഒരു മണിക്കൂറും അഞ്ച് മിനിറ്റും നീണ്ട വാശിയേറിയ ക്വാര്‍ട്ടര്‍ പോരാട്ടത്തില്‍ മലേഷ്യയുടെ കാങ് ഖായ് സിംഗ് – ആരോണ്‍ തായ് സഖ്യത്തെയാണ് ഇന്ത്യന്‍ സഖ്യം വീഴ്‌ത്തിയത്.
ആദ്യ സെറ്റ് നഷ്ടമായ ശേഷം ശക്തമായി തിരിച്ചടിച്ചായിരുന്നു ഇന്ത്യന്‍ താരങ്ങളുടെ വിജയം. സ്‌കോര്‍: 19-21, 21-17, 21-13. ശനിയാഴ്ച നടക്കുന്ന സെമിയില്‍ ദക്ഷിണ കൊറിയയുടെ എസ്.ജെ. സിയോ – ഡബ്ല്യു.എച്ച്. കിം സഖ്യത്തെയാണ് സാത്വികും ചിരാഗും നേരിടുക. മിക്‌സഡ് ഡബിള്‍സില്‍ ഇന്ത്യയുടെ ധ്രുവ് കപില – തനിഷ ക്രാസ്റ്റോ സഖ്യവും അവസാന നാലില്‍ ഇടംപിടിച്ചു. ക്വാര്‍ട്ടര്‍ മത്സരത്തില്‍ മലേഷ്യയുടെ ചെന്‍ ടാങ് ജീ – തോ ഈ വീ സഖ്യം പരിക്കേറ്റ് പിന്മാറിയതോടെയാണ് ഇന്ത്യന്‍ സഖ്യം സെമിയിലെത്തിയത്.
മത്സരത്തിന്റെ ആദ്യ സെറ്റില്‍ ഇന്ത്യന്‍ സഖ്യം 16-18 ന് പിന്നില്‍ നില്‍ക്കുമ്പോഴായിരുന്നു മലേഷ്യന്‍ താരത്തിന് പരിക്കേറ്റത്. സെമിയില്‍ ജപ്പാന്റെ എസ്. ഹൊബാര – വൈ. ഷിമോഗാമി സഖ്യമാണ് ഇവരുടെ എതിരാളികള്‍.
അതേസമയം, വനിതാ സിംഗിള്‍സില്‍ ഇന്ത്യയുടെ മെഡല്‍ പ്രതീക്ഷയായിരുന്ന പി.വി. സിന്ധു ക്വാര്‍ട്ടറില്‍ പുറത്തായി. ലോക ഒന്നാം നമ്പര്‍ താരം ദക്ഷിണ കൊറിയയുടെ ആന്‍ സെ യങ് ആണ് സിന്ധുവിനെ പരാജയപ്പെടുത്തിയത്. 48 മിനിറ്റ് മാത്രം നീണ്ട മത്സരത്തില്‍ നേരിട്ടുള്ള സെറ്റുകള്‍ക്കായിരുന്നു കൊറിയന്‍ താരത്തിന്റെ വിജയം. സ്‌കോര്‍: 21-17, 21-14.
പുരുഷ സിംഗിള്‍സില്‍ ഇന്ത്യയുടെ അവസാന പ്രതീക്ഷയായിരുന്ന ലക്ഷ്യ സെന്നും ക്വാര്‍ട്ടറില്‍ പൊരുതി വീണു. ജപ്പാന്റെ കോകി വതനാബെയോടാണ് ലക്ഷ്യ സെന്‍ പരാജയപ്പെട്ടത്. ആദ്യ സെറ്റ് 21-19 ന് നഷ്ടപ്പെട്ട ശേഷം, രണ്ടാം സെറ്റ് 21-15 ന് നേടി ലക്ഷ്യ സെന്‍ മത്സരം നിര്‍ണായകമായ മൂന്നാം സെറ്റിലേക്ക് നീട്ടിച്ചെങ്കിലും, അവസാന സെറ്റ് 21-15 ന് സ്വന്തമാക്കി വതനാബെ സെമി ഉറപ്പിച്ചു.
